التسجيل

تسطيع تسجيل الدخول عن طريق الفيس بوك



كلمة المرور سوف ترسل الى بريدك الألكترونى.
بســـم الله الرحمن الرحيــــم
السلام عليكم ورحمه الله وبركاته
شلونكم وشخباركم يا اعضاء العرب المسافرون ان شاءالله بخير
مثل منتوا شايفين اليوم تقريرنا عن بلد التــــاريخ والفن والحضاره انها رومـــــــــا
وصج لا قالوا كل الطرق تؤدي الى رومــــــــا
ابتدي معاكم رحلتنا الخفيفه والسريعه الى بلد الطليـــــــان ،،
المسافرين 3 من المجندات بدايه الرحله اسبوع في بلد الضباب واسبوع في بلد الطليـــــان ..
كانت الرحله الى روما من تاريخ 01/01
الناقل الرسمي لنا الطيران البريطاني

التذكره كان سعرها 196 دينار كويتي للشخص ( كويت – لندن – روما- لندن – كويت )
السكن كان من نصيب فندق
Rome Marriott Grand Hotel Flora
على شارع فنيتو Via Vittorio Veneto

http://www.marriott.com/hotels/trave…d-hotel-flora/

تقيمي للفندق 5/5
السعر ل 5 ليالي في 6 ايام 740 ينار كويتي شامل الضريبه والريوق (الافطار) النوع سويت ..
وهذا الفندق من بره


وهذا اللوبي والاستقبال

وهذا السويت ( ماعليه عفسناه اول مادشينا بعد تدرون مجندات




وهذا الكبت ( الخزانه )


واهني الحمام عزكم الله

المنظر اللي نطل عليه

وهذا الممر

الريوق كان في السطح (الرووف) وايد حلو والمنظر احلى وفيه قعدات بره بس ما كان في احد قاعد من البرد الكل داخل..

وهذا المنظر اللي بره من صوب الريوق

وجذي خلصنا من الفندق اول يوم وصلنا متأخر ريحنا وبالليل طلعنا تمشينا في شارعنا فينتو وهذيل بعض الصور عنه وفيه كافيهات ومطاعم قعدنا في كافيه وردينا الفندق وساحه باربريني pizza barberini كانت يمنا ونروح لها مشي والسفاره الامريكيه تقريبا كل شي يمنا ونقدر نروح له مشي ..

وهذا اهو الشارع واغلبيته فنادق





الساحه


واهني انتهي معاكم لليوم الاول في بلد الطليــــان ..
والقاكم ان شاء الله في يوم ثاني من هذي الرحله

*******
اكمل معاكم ثاني يوم من رحلتنا الرومانيه
قعدنا الصبح وجهزنا عمرنا وتريقنا وتوكلنا على الله ندور لنا شركه اتصالات وخذينا خط بلاك بيري من شركه tim اعتقد 50 يورو نسيت بالضبط جم لمده شهر .. وبعدها خذينا الباص تور لمده يومين كل شخص 28 يورور بس احنا مااستخدمناه الا يوم ..
الباص يلف فيكم اهم المعالم والشوارع في روما ومنها :
1- ساحه فينيسا والنصب التذكاري pizza venezia
2- المدرج الروماني colosseo
3- ساحه الرسامين piazza navona
4- قلعه سانت انجلو castel s.angelo
5- الفاتيكان في ساحه سانت بيترو pizza s.pietro
6- شارع نازيونالي و دل كورسو via nazionale & via del corso
7- الدرجات الاسبانيه spanish steps – spagna وهناك في سكيك وشوارع كلها ماركات عالميه .
8- نافوره تريفي fontana di trevi
9- ساحه باربريني piazza barberini
10- كنيسه سانتا ماريا s.maria maggiore
11- محطة القطار الرئيسيه في روما واسمها تيرمني وساحه الجمهوريه pizza della repubblica & stazione centrale roma termini

تقريبا هذيل اهم الاماكن اللي يمر عليهم الباص

وهذيل بعض الصور من يومنا الثاني في روما ..

النصب التذكاري وساحه فينيسا مقابله للنصب التذكاري

المدرج الروماني

ساحه الرسامين


قلعه سانت انجلو


الفاتيكان وساحه بيترو

شارع نازيونالي ودل كورسو

الدرجات الاسبانيه




كل النوافير صالحه للشرب



المكان اللي عليه سهم هذا الشارع اللي فيه اغلب الماركات









نافوره تريفي ( بصراحه توقعتها في مكان غير هالمكان واكبر من هالحجم المكان كان وايد صغير وزحمه حيل ولافيها كافيهات مجبالينها كل المطاعم والكافيهات بالسكيك ) بس هم حلوه ..







ساحه باربريني


كنيسه سانتا ماريا

ساحه الجمهوريه

محطة تيرمني روما

وينتهي يومنا الثاني في بلد العشـــاق

****************

اكمل معاكم اليوم الثالث في بلد الطليان ومع المجندات ووين راحوا ؟؟؟

كنا متفقين من امس بالليل وين راح نروح ورسينا على بر الحمدالله وتم الحجز والموعد لرحلتنا اليوم ..

الحجز كانت تكلفته 60 يورو لل 3 مجندات يعني كل وحده 20 يورو
الوقت المحدد الساعه 9 الصبح والرجوع الساعه 2 الظهر ..

قعدنا الصبح وعينا من الله خير ورحنا تريقنا

بعدها وصلت السياره بالوقت 9 احنا ماشين من الفندق ومرينا على فندقيين يبعدون عنا تقريبا 3 – 4 دقايق كمل القروب اللي معانا في السياره والاتجاه الى


castel roman designer outlet

Castel Romano Designer Outlet

تقريبا الوقت اخذ منا 40 دقيقه وصلنا قبل ماتفتح المحلات ب 10 دقايق .. وخذيت جم صوره للاوت لت على مايفتحون باجي المحلات وعقبها نسيت التصوير




وصارت الساعه 2 خلصوا المجندات ورحنا سيارتنا ننطر القروب اللي معانا




رجعنا الفندق على 3 صلينا ولبسنا عدل لان البرد زاد اشوي ورحنا لمكان واايد حلو ومشهوور

بيزا نافونا ساحه الرسامين piazza navona






كلها عروض وكشكات بيع العاب واكل واكسسورات والخ والرسامين اشوي اللي شفتهم وحوالين الساحه مطاعم ..










منو يبي 🙂 يم يم

وبعد ما افترينا وخلصنا من الساحه كنا راح ناكل بعض وعلى اي مطعم جدامنا من المطاعم اللي على الساحه وتعشينا سامحوني ماصورت الرحله هذي صور الاكل اشوي لاني وقتها اكون يوعانه ومالي مزاج اصور:) كانت الطلبات (رافيلو – خبز بالثوم – بيتزا – باستا – روزيتوووو- 1 كولا و 2 سبرايت و جيلاتو 3 اللي اهو ايس كريم ) تقريبا 50 يورو واخذنا تاكسي ردينا الفندق ليوم يديد في بلاد الطليان وتقريبا تكلفه التاكسي 10 او 11 يورو ..
اتمنى يعجبكم اليوم هذا في بلد الفن والتاريخ روما

****************
اكمل اليوم الرابع في بلد الطليان
اليوم قعدنا الساعه 5 الفير نستعد لرحلتنا لان قطارنا راح يمشي 6:45
وصلنا المحطه الساعه 6:15
الحين راح اتعرفون وين رايحيين من صباح الله خير

وصلنا محطة تيرمني اللي في روما اهي المحطة الرئيسيه للتنقلات

هذا سايت لحجز القطارات

http://www.trenitalia.com/cms/v/inde…0080a3e90aRCRD

وصلنا محطتنا اللي نبيها وهذي اهي من بعيد مبينه مدينه العشاق والرومانسيه انها فنيسيا – البندقيه

المحطه اللي ننزل فيها اسمها فنيسيا سانتا لوتشيا venezia santa lucia وكان سعر التذكره بحدود 80 يورو الفاست ترين القطار السريع ..

يومها كان حييييييل بررررررد مووووت اللي راح يروح في الشتا وخصوصا فنيسيا يلبس عدل .. وحده من المجندات مسكييينه قصت عليها الثالثه قالت لها لاتلبسين ترا بحر وحر ورطووبه مو مثل روما وهذي مسكينه تفصخ وتلبس لها خفيف وحتى اللي تقول حر لبست خفيف الا انا حتى اهما اقعدوا يتحلطمون علي اشدعوه عليج مجكبنه عمرج قلت هذي فينيسيا يبا وبحر وشتا شنو راح يكون الجو ترا مو بوكت رايحين وليما وصلنا لوووول اهني المقلب ماتوا من الببببببررررردد يدورون اي شي يلبسون كل وحده شرت لها بلوفرين قلقتهم يعيبون علي ..

اول ما طلعنا من المحطه اتحصلون محطات الباصات المائيه والتكاسي والجندولا يوصلونكم لي المنطقه اللي تبونها واغلاهم الجندولا وارخصهم الباص او العباره .. احنا اول شي كنا بنروح تاكسي قال 60 يورو والجندولا قال 120 يورو اما الباص 13 يورو لكل شخص رايح راد لمده يوم طبعا خذينا الباص ..

اهني يبين اقدم جسر والخط الفاصل لمنطقه سان ماركو واهو جسر الريالتو ..



واهني محطه الباص المائي اسمها ferrovia railway station



هذا خط الباص المائي يبين لكم من وين مشينا ورايحين وين

وصلنا المكان المقصود piazza san marco ساحد القديس وتضم كنيسه سان ماركو وقصر دوجي وبار هاري وقصر سان مويس وكانت موقع حكومه البندقيه وصارت الحين منطقه سياحيه فيها فنادق والمحلات والبنوك والخ ..

بعض الفنادق

هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 615×408 .


تمووووت على شي اسمه اقنعه بصراحه ودي اخذهم كلهم

ورحنا ركبنا الجندولا مده 30 دقيقه 60 يورو ل 3 اشخاص يعني كل وحده 20 يورو وفي معاه ضيوف المفروض احنا الضيوف لان اهما اللي قالوا تعالوا معانا .. 2 اركبوا معانا يحليلهم خوش ناس بس صار ضيج موقادرين ناخذ راحتنا بالتصوير ونوخذانا كل شوي يقول لا اتحروكون وكنا مزعجيين صراحه يعني الكل عايش حياة الرومانسيه كل 22 بواحد احنا لا غيرنا وخربنا على اللي معانا

هذيل ربعنا جينغ جون جنغ يعني صار عددنا 5



هذي الساحه من بعيد




الله على سكيك البندقيه والله عليها صج مدينه العشاق الكل كان عاشق الا احنا ال 3













هذا يعتبر الفندق الافضل في فينيسيا على كلام نوخذانا واسمه Centurion Palace واللي واقفين بره ناطرين تاكسي

Booking.com: فندق Centurion Palace, فينيسيا, إيطاليا – 132 آراء النزلاء. احجز فندقك الآن!=


******************

والحين رايحين لساحه سان ماركو






وردينا للاقنعه مره ثانيه


مع هالبرد حاشنا اليوع ودخلنا هالمطعم تغدينا وهذي طلبتنا طبعا الروزيتو طلبي والرافيلو

في سنه 1966 غرقت البندقيه وشوفوا الماي لي وين وصل

هذيل المطاعم والكافيهات يحطون طاولاتهم بالساحه لان القعده حلوه بس وقتنا ما كان في وايد ناس لان الجو حيييل بااارد بس بالصيف زححمممممه


وطبعا ما نستغنى عن الايس كريم – جيلاتو لذييييذ

قعدنا نوكل الحمام يمكن نص ساعه وتصوير والاودام يضحكون علينا في وحده صورتنا لما اشبعت والله فوق ال 20 صوره يمكن ومشت ولاحتى شفنا صورنا



وبعد الحمام بدينا بالسووق عدوي اللدوود





وبعد ماخلصنا من السوق والتمشي خذينا الباص المائي وردينا عند محطتنا ننطر القطار لروما


هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 605×380 .

تقريبا من روما لي فينيسيا 3 ساعات 45 دقيقه وايد بعيده ودربها طويل بس تستاهل العنوه رجعنا روما تقريبا الساعه 11 بالليل ..
وهذيل صورتين لشرح تذاكرنا اسم المحطة وكراسينا والحافله اي رقم والساعه .. حجزنا خذينا من مكتب يم الفندق ما حجزنا من المحطه ماكان عندنا وقت ..

وبجذي ينتهي يومنا الرابع في ايطاليا الرائعه واتمنى يعجبكم هالجزء ..
يترى عقب التعب من هاليوم اتهقون وين بنروح اليوم الخامس

***************

اليوم الخامس لنا في بلد الطليان ومن عقب رحله امس قعدنا اشوي متأخر اليوم على 7:30 وكنت قبلها داشه النت اشوف متى في اقرب قطار يروح على فلورانس ولقيت اقرب شي 9:15 على ماعينا من الله خير واتريقنا رحنا محطه التيرمني وحجزنا تذكره لفلورانس ومن فلورانس نحجز تذكره لبيزا ..
ليش سويت جذي الحجز ؟؟ لان اول شي خفت اخذ القطار اللي من اوصل فلورانس وعلى طول لبيزا يمكن انتاخر وليش ماخذيت التذكره تو وي بعد لان موعارفين متى راح نمشي من بيزا يعني مومحددين اوقاتنا .. اول شي حجزنا لفلورانس 9:15 ومشينا من روما لي فلورانس ..
هذي صوره التذكره من روما لي فلورانس ويسمونها فرينزي firenze (فلورانس) .. انا حاطه دوائر على والوقت واسم المحطه والخ بس ماادري ليش جذي نزلوا

من روما لي فلورانس بالقطار السريع 1:23 وبسعر 45 يورو للشخص الواحد ون وي .. اتوقع اذا تو وي وقروب راح تكون اقل ..

Trenitalia – HomePage

وهذيل الصور من الطريج

وصلنا محطة فلورانس

صوره بس وحده لفلورانس وتحسفنا ليش ماقعدنا فيها مع انه الكل مادحها لي بس ما كان في وقت ..

ورحنا انحجز قطار من فلورانس لي بيزا اليوم هذا سميناه رحله القطارات التذكره 5.6 يورو تقريبا للشخص وتبعد عنها ساعه..

هذي محطه بيزا ذكرتني بمحطه كارديف


المنطقه وايد فيها من الجاليه الافريقيه ماحبيتها من كثرتهم .. كانت اشكالهم مو مريحه ..
هذا واحنا رايحين للبرج



طبعا الاودام نشوفهم كلهم من بعيد اللي يدز البرج واللي يبوسه واللي شايله حركات احنا قلنا يله معاهم مع الخيل ياشقره

واهني محلات السوفنير


وبعدها رجعنا لفلورانس ومنها لروما .. وصلنا روما تقريبا على ال 6 المغرب رحنا الفندق صلينا وقطينا الاغراض وبعدين رحنا انكمل السوق اشوي ولهانين عليه

رحنا شارع دل كورسو اتسوقنا واتعشينا del corso

الحلو في زينتهم الوانها مثل علمنا

وبعدها دشينا هذا المجمع وتعشينا فيه ..




في هذا الكافيه اللي بالنص تعشينا


طلبنا سلطات وباستا ورزيتو ورافيلو وخبز بالثوم وسوفت درينك وبعدها حلينا وشربنا قهوه تقريبا شي 60 يورو ..
فلورانس انصح في زيارتها لان واايد حلوه احنا ما قدرنا لان ماعندنا وقت هذا سايت عنها وان شاءالله يفيدكم

Florence City Sightseeing tours

واهني سايت عن فينيسيا ورحلات لمصانع الزجاج واايد حلوه هالرحلات بس احنا بحكم مدتنا ماقدرنا نروح

Ricerca – turismovenezia.it

وبجذي انتهى يومنا الخامس وان شاءالله تستمتعون فيه .. ويبقى لنا اليوم الاخير واهو اليوم السادس لنا في روما والعصر طيارتنا وين رحنا بعد ياترا

******************
اليوم الاخير لنا في روما من بعد مارجعنا من رحله البارحه البنات قالوا بس نبي نريح ومانبي نطلع انا قلت كيفكم انا وحده بطلع الساعه 8 الصبح اكون بره الفندق .. وتم هذا الشي انا الساعه 8 الصبح كنت في دوله داخل دوله

واهي الفاتيكان
راح نتكلم عنها نبذه صغيره خذيتها من موقع ويكيبيديا

الفاتيكان (Vatican)

هي أصغر دولة في العالم و مقر الكنيسة الكاثوليكية تقع في جنوب أوروبا في قلب العاصمة الإيطالية روما على الجانب الأيمن لنهر التيبر ، كانت جزء من الدولة الإيطالية لحين 1929م حيث تم الاتفاق على إنشاء دولة ذات كيان مستقل، تُدار من قبل بابا الفاتيكان والذي يعتبر أيضا القائد الروحي لما يقارب المليار كاثوليكي في مختلف بقاع الأرض .

السكان

جميع سكان الفاتيكان هم من العاملين في الدولة، و خاصة رجال الدين. حرس الفاتيكان هم سويسريون. هناك عدة آلاف من العاملين الإضافيين ، اللذين يسكنون خارج حدود المدينة. اللغة الرسمية هي اللاتينية، اللتي كانت يوماً ما لغة الرومان، بقيت كلغة رسمية للدين المسيحي الكاثوليكي. في الواقع فإن اللغة الإيطالية هي اللغة السائدة بين السكان و العاملين في الفاتيكان وهي الدولة الوحيدة التي لا تحتوي على أطفال

النظام السياسي

النظام السياسي في الفاتيكان هو معقد بعض الشيء. البابا هو رأس الدولة. يتم انتخابه من قبل مجلس الكرادلة لمدى الحياة. يتم ذلك في الكنيسة السيستينية في قلب الفاتيكان. البابا يتمتع بسلطات تنفيذية، تشريعية و قضائية مطلقة. كما أنه يعين الطاقم الإداري لمساعدته القيام بإدارة الدولة كل خمس سنوات. وزير الدولة هو يكون مسئول عن العلاقات الخارجية للفاتيكان و الكرسي البابوي.

الاقتصاد

تتمتع دولة الفاتيكان باقتصاد فريد من نوعه فهو غير تجاري مدعوم من قبل التبرعات المالية التي تعرف باسم (بنس بطرس) التي يدفعها الكاثوليك من كل أنحاء العالم، وتنتفع أيضا خزينة الدولة من عائدات السياحة وبيع الطوابع والتذكارات السياحية ، كما أن العمال والموظفين المدنيين يستفيدون هناك من أجور ورواتب تفوق أجور نظراءهم في روما .

العملة الرسمية للفاتيكان

هي اليورو منذ الأول من يناير/كانون الثاني 2002 م وتصك الدولة اليورو الخاص بها لأغراض السياحة أيضا حيث يسعى جامعو العملات على أقتناء هذه النسخة من اليورو ، وسابقا كانت العملة المتداولة هي الليرة المساوية لليرة الإيطالية آنذاك .ويوجد للدولة مصرفها الرسمي باسم le Opere di Religione ويعرف أيضا ببنك الفاتيكان .

بلغت عائدات الدولة عام 2003 252 مليون دولار أمريكي. معظمها آتي من السياحة، الطباعة ، نشاط بنكي في المصارف العالمية والتبرعات ومن منح الدول الأخرى.

الحين انشوف اشويه صور من الفاتيكان (المبنى فـــــــن معماري بحد ذاتـــــه)






خلصت من جزء الفاتيكان

مسائكم خير
اكمل معاكم ان شاءالله الجزء الاخير من هاليوم ومن السفره

من بعد الفاتيكان اتجهت الى مايسمى بالمدرج الروماني او الكولوسيوم Colosseum

هذا سايت لحجز تذاكر للمدرج او اي متحف في روما .. انا مادخلت داخل المدرج بس من بره

http://www.rome-museum.com/?gclid=CN…FVE8fAodXHgWKQ

يعد المدرج الروماني الشهير في روما “الكولوسيوم” الأكثر إستقطاباً للسائحين الأجانب، وقال نائب وزير الثقافة الإيطالي فرانشيسكو جيرو أن مبيعات تذاكر المواقع الأثرية في روما ” بلغت 41 مليون يورو، علماً أن عائدات زيارة الكولوسيوم والميدان الروماني والمواقع الأثرية المحيطة به تدر وحدها ريعاً يزيد على 30 مليون يورو”.
مضيفاً, وفقا لوكالة “آجي” الإيطالية للصحافة: ” تُبيّن هذه النتائج أن ثلث السائحين تقريباً أي ثمانية ملايين سائح من أصل 33 مليوناً من المترددين على المتاحف والمعالم التراثية في إيطاليا يزورون روما ويحرص خمسة ملايين منهم على دخول الكولوسيوم ما يجعله الموقع الأثري الأكثر استقطاباً للزوار في إيطاليا “.

ويسمي “الكولوسيوم” بالأصل المدرج الفلافي في روما, والذي تم بناءه للإحتفال بنجاح المحاربين وللإحتفاء بعظمة الإمبراطورية الرومانية, وكان في الأصل ساحة تستخدم في قتال المصارعين أو مباريات المصارعة والعروض العامة الأخرى والمسابقات الجماهيرية، علي مدار 500 سنة, إلا أنه تحول مدرج روماني عملاق مقام في الهواء الطلق وسط مدينة روما يسع في الأصل حوالي 45000-50000 مشاهد.
وقد تم البدء في بنائه ما بين عامي 70 و 72 بعد الميلاد تحت حكم الإمبراطور فيسباسيان وتم الانتهاء منه بشكل أساسي سنة 80 في عهد تيتوس، كما تمت بعض التغييرات الإضافية في عهد دوميتيان.

ويكيبيديا
والحين بعض الصور

بعض الاثار اللي حوالين المدرج بس صورتهم من بعيد ما دخلت







رايحه لساحه فينيسيا اللي فيها النصب التذكاري







ولقطه وداعيه عند نافوره تريفي


بعدها رجعت الفندق والبنات كانوا تقريبا خالصين على ال 1 الظهر سوينا check out والساعه 2:30 وصلنا الشتل اللي يوصلنا المطار اهو نفسه اللي وصلنا الفندق واخذ منا 60 يورو يعني كل وحده 20 يورو وطيارتنا تطير الساعه 5 ..

وصلنا المطار بس للاسف ماسوينا تاكس فري tax free لان من قبل صايره سالفتين حق اهلنا وحده خذوا جنطتها وبعدها ماشافتها و الثانيه بعد قالوا لها خليها واحنا انوديها الطياره قالت لا ماابي لان نفس حركة الاولى جذي قالوا لها ومسكينه بعدها الجنطة ورا الشمس فأحنا قلنا بلاها تاكس فري اهم شي اغراضنا معانا

وهذيل جم صوره من المطار

اهني انا الوحيده من البنات اللي فتشوني ماادري ليش وفتشوا ناس غيري بس تفتيشهم كان مو حلو تقريبا انا نص ساعه واهما يفتشون جنطتي ولما شافوا جهازي الربو سووا سالفه وليش هالجهاز وما ادري شنو ويبون تصريح طبي قلت والله هذا كل مكان معاي مااقدر اخليه ومحد طلب مني تصريح طبي الا انتوا والله طلعوا عافيتي على مايفهمون واخر شي طوفوني


وبجذي انتهي معاكم في التقرير الايطالي الخفيف واتمنى يعجبكم

وبالاخير اقولكم : كــــــــل الطـــــــــرق تـــــؤدي الـــــــ رومــــــــــــــا ـــــــى

4 تعليقات

  1. الايماان

    الحمدلله على سلامتج وسلامه المجندات
    توني أشوف التقرير بالصدفة … ماشاءالله تقرير مشوق ورائع بروعه صاحبته
    ذكرتيني بروما وميلانو الله ياحلووووها
    ماشاءالله رحلة حلوه وايد بس انا ماأحب البرررررد ومااستمتع فيه
    التقرير راااااااائع حسافه خلص بسرعة
    وسلامي للمجندات

    رد
  2. nanaabuabed

    الف الحمدلله عسلامتك مشرفتنا
    تقرير غني وكله حركة ونشاط تابعته بكل الانشطة والفعاليات المتعددة
    روما تستحق الزيارة مدينة غنية بالتاريخ والمعالم التي وردت بالكثير من القصص التي تبقى في البال
    تسلم الايادي ياغالية ..

    رد
  3. cenuor

    تسلم يديك على هالموضوع هيجتني فيني الذكريات .. رايح لها قريب ان شاء الله الخميس فيها

    رد
  4. فيصل

    لا هنتي
    لحقنا علي اخر التقرير الرائع
    شكرا لك

    رد

أكتب تعليق

عنوان بريدك الالكتروني لن ينشر.