الرئيسية > التقارير > اوروبا > فرنسا > نصائح من رحلتي الى فرنسا | معلومات تفيد المسافرين اول مرة

نصائح من رحلتي الى فرنسا | معلومات تفيد المسافرين اول مرة

في هذا التقرير انقل لكم نصائح من رحلتي الى فرنسا ، ومبدئيًا لا انصح بالتخطيط الدقيق للرحلة حيث أنه يقتل متعة المفاجأة. خطط مسبقًا ولكن اترك مساحة للاستكشاف.

اقرأ أيضًا: ترشيحاتنا لـ 8 من افضل فنادق باريس القريبه من الشانزليزيه

نصائح رحلتي الى فرنسا

السكن في فرنسا

السكن يعتمد على وضعك لكن اهم شيء عامل هو الامان بعدين روح للإختيار. اذا مخطط تتنقل بأوبر معناها دور مكان يكون كويس تقدر توصل فيه بسرعه لأغلب الأماكن السياحية.

اذا معتمد على القطار دور على محطة يكون فيها أكثر من لاين وقريبة من السنتر. اذا تحب تمشي لازم تسكن في منطقة في السنتر.

اذا معك سيارة شوف مكان سعر الموقف يكون رخيص او فيه مواقف مجانية.

اذا حجزت فندق تأكد من شروط الحجز. بعضها يقول لازم تحط تأمين ٢٠٠ او ٣٠٠ يورو او يحجزها من بطاقتك. وبعضهم يقول الاستقبال لين ٦ مساءا وبعدها يكون فيه طريقة لتسجيل الدخول. اقرأ شروط الفندق وابحث عن الفنادق اللي الاستقبال فيها طوال اليوم.

بالنسبة للفطور ترى فطور الفندق غالي اذا انضاف لسعر الغرفة وماله الا ميزة وحدة يخليك تبدا يومك بشكل سريع ويفكك عناء الاختيار بين اماكن الفطور. اما الافضل انك تحجز بدون فطور وكل يوم افطر شيء مميز وبسعر ارخص بواجد.

اقرأ أيضًا: دليل شامل ومفصل عن افضل احياء باريس | مناطق السكن في باريس

المواصلات في فرنسا

لازم تحدد من قبل وسيلة المواصلات اللي تبيها قبل توصل. اذا يهمك التوفير أفضل شي المواصلات العامة. إذا ماتفرق معك أي خيار ثاني بيكون مناسب لك.

لمتعة أكبر: في الشتاء حاول تختار مدن اكثر وارياف أقل وفي الصيف العكس. السيارة مو مهمة أبدا اذا تبي تروح مدن فقط ، المواصلات العامة بكل مكان واوبر موجود اذا احتجت.

بطاقة وسائل النقل العام weekly pass

تذكرة weekly pass شاملة لجميع وسائل النقل العام في باريس من مترو وباص وقطار. مدتها 7 أيام بـ 5 يورو ثم يتم شحنها بـ 22 يورو بمجموع 27 يورو.

ضروري يكون معك صورة أو تتصور عندهم بـ 5 يورو ويتم اضافتها في بطاقتك.

طريقة استخراج البطاقة من مكتب الخدمات في أغلب المحطات

محطات البنزين افضل شيء تدفع كاش لأن بعض المحطات يحجزون على مبلغ مقارب لعملية التعبئة ممكن ١٠٠ يورو وعليها لمدة اسبوع كذا وبعدين يرجع لك + التأمين حق السيارة ادفعه كاش افضل عشان اذا سلمت السيارة يرجع لك كاش وتتجنب عمليات الانتظار الطويلة.

اذا حجزت سيارة اونلاين ، افتح الشروط تلقى مبلغ الوديعة كم بيكون. بعضهم سعر السيارة يكون رخيص لكن الوديعة تكون ٣٠٠٠ يورو. لذلك تأكد ان الوديعة ماتزيد عن ٥٠٠ او مقارب لها.

الشراء من باريس وإعادة الضرائب

اذا تبي تشتري عطور وماعندك شيء محدد تخاف ماتلقاه ، لا تشتري الا من السوق الحرة بعد الجوازات وقبل تدخل بوابتك حقت الطيران.

هذي المنطقة مافيها تاكس يعني ما يحتاج تسوي تاكس فري + لك خصم ١٠٪؜ اذا حملت تطبيق Paris Airport وسجلت فيه ووريتهم الكود اللي يظهر لك.

طريقة استرجاع التاكس في دول اوروبا:

طريقة اعادة التاكس سهله مرة. دولة لها شروط لاسترجاع التاكس بس بالغالب لازم يكون عمرك اكبر من ١٦ وعندك الجواز وقت الشراء ويكون مجموع مشترياتك اكثر من ١٠٠ يورو.

كل اللي عليك وقت الشراء تقول لهم ابي Tax free form وهم راح يعطونك ظرف فيه الفاتورة وورقة استرجاع التاكس.

خلهم مع بعض ولا تطلعهم او تجمعهم مع فواتير ثانية. اذا وصلت المطار قبل الجوازات فيه مكتب الجمارك Customs هذولي لازم يشيكون ان القطعه معك ويختمون على الفاتورة انك تسترجع التاكس.

بعدين عندك خيارين اذا تبي كاش او ترجع الفلوس على بطاقتك او على اي بطاقة ثانية تبيها حتى لو مو لك. اذا تبي على بطاقتك تكتب رقم الكردت كارد على نفس الفورم اللي جبته من المحل وتحطها بصندوق جنبهم وخلاص ترجع لك الفلوس بعملتك بعد ٣ اسابيع.

اذا تبي كاش تخلي الاوراق معاك وتروح للجوازات تخلص امورك بعدها في السوق الحرة تلقى مكتب اسمه Tax refund ياخذ منك الفواتير ويعطيك كاش يورو لكن تراهم ياخذون رسوم على كل فاتورة. الرسوم تختلف بحسب المبلغ وبحسب الشركة اللي طالعه منها فاتورة التاكس فريي (مو المحل اللي شريت منه)

طريقة استرجاع التاكس في فرنسا:

في فرنسا اذا الاغراض شريتها من فرنسا طريقة الاسترجاع سهله بدون ماتمر أحد ، بس تروح لجهاز جنب الجمارك تسوي سكان لباركود اللي موجود في الفورم اللي عطاك اياه المحل وخلاص.

اذا تبي الفلوس ترجع لك على بطاقتك مايحتاج تسوي شي ثاني ، اذا تبيها كاش تختار كاش بعد ما تسوي سكان وتروح للمكتب اللي بعد الجوازات وتاخذ فلوسك. لكن اذا الاغراض شريتها من برا فرنسا لازم تروح للجمارك وتسوي نفس الخطوات اللي فوق لأن بالغالب مايشتغل الجهاز معاك. فمن البداية لازم تفصل فواتير فرنسا عن الاماكن الثانية.

أسعار المطاعم والمقاهي في فرنسا

دايم المطاعم والكوفيهات اللي بتوصيات او مشهورة اسعارها غالية ولازم حجز لكن ميزتها الأكل ممتاز بالغالب مع ان مو دايم. حط في بالك يمديك تحصل مطاعم رهيبه وبأسعار أقل بكثيييير وبجودة مقاربة.

استئجار سيارة في فرنسا

السيارة رائعة بس مشكلتها بالمدن اسعار المواقف. يعني بالسكن راح تلزمك تدور فنادق فيها مواقف مجانية وغالبا بتكون برا المدينة او فنادق اسعار مواقفها قليل. واذا تبي تاخذها للمدينة راح تدفع في كل مكان تروح له وتبي توقف فيه، وغير كذا زحمة المدن لا تطاق.. غير كذا راح تشيل هم اذا ماسويت تأمين شامل.

افضل خيار اسكن في قلب المدينة واستخدم المواصلات العامة واوبر. حط في بالك انت جاي تستمتع مو تتهجول.

التنقل بين المدن

القطار بين المدن مريح. فيه عدة مزايا تشمل:

  • واي فاي مجاني
  • دورات مياه
  • كافتيريا فيها قهوة وحلى وأكل ولك مكان مخصص
  • النافذة كبيرة .. بحيث تستمتع بالمناظر
  • تقدر تقرأ او تشتغل على اللاب او تنام.

اشتراطات كوفيد

الاشتراطات تتغير من وقت لوقت ومن يوم الى يوم. حاول تقلل التنقل بين الدول ، ماتدري يجي يوم مايمديك ترجع للدولة اللي رحلتك منها او يكون لهم متطلبات او حجر.. الخ .. ما ابي اخوفك بس خلها في بالك

فيه نوعين من الفحص PCR يكون اغلى ونتيجته تطول تاخذ ٢٤ ساعة .. والسريع اللي هو Antigen يطلع في ١٠ دقايق وارخص. لازم تتاكد من الناقل وش يبي فحص .. بعض الاحيان الدولة ماتطلب فحص لكن الخطوط اللي طالع عليها تطلب على كل راكب.

كل موقع خطوط فيه صفحة عن الاشتراطات اللازمة للخطوط علشان كورونا، اقراها ماتاخذ منك ربع ساعة ويمكن تفكك من خطأ يكلفك قيمة تذكرة.

مجموعة متنوعة من نصائح من رحلتي الى فرنسا

  • لا تكثر متاحف واماكن تزورها في يوم واحد.. ترى كل ماكان يومك خفيف ومافيه هجوله كل ما استمتعت اكثر.. ممكن جلسه بحديقة قدام نافورة وتشرب قهوة تسوى شهر.
  • اسئل عن كل شي واذا محد فهمك قول ابي احد يتكلم انجليزي. انا زمان كنت اذا تورطت بسبب اللغة اقبل اي شي لأني اكون محرج🤣.. اللحين لا اسئل واقول ابي احد يتكلم انجليزي واطلع من السرا وانتظر لين يجي احد يجاوبني.. وبالمطعم اسئل وهم يجاوبون حتى واذا بعضهم منفس ماعليك هذا طبعهم.
  • شنطة الظهر (حقت المدرسة) افضل خيار سويته بحياتي وقت السفر. تنفعك اذا بتروح اماكن فيها مشي او شي يتطلب مجهود بدني.. تحط فيها موية سناك كاميرا مظلة شطاف اغراض يمكن تشتريها وتشحن جوالك اذا كان بالشنطة USB. يعني خل الشنطة من مادة مقاومة للماء وفيها مخرج usb صدقني تستمتع اذا انت من هواء المشي.
  • كل المطارات زينة وكويسة لكن يعتمد على توقيتك متى وصلت بأي يوم وكم كمية الناس الموجودة.. الخ فلا تبحث عن احسن مطار
  • اذا طلعت فيزا من سفارة مو لازم تروح لها. يعني اذا طلعت فيزا فرنسية وبتروح اسبانيا. خل معك حجز بالغاء مجاني لاول يوم باسبانيا والباقي فرنسا. واذا سألك قول له انا اطول مدة اقامة عندي بفرنسا واذا قال كيف بتروح قول بستاجر سيارة وخلاص.. يدخلك بعدين الغي حجوزاتك واجلس كامل المدة باسبانيا
  • حاول يكون مسارك مو دائري اذا بتروح دول. يعني خل الذهاب من مكان والعودة من مكان ثاني. صح اغلى شويتين + اذا معك سيارة بتكون رسومها اعلى لأنك بتسلمها بدولة ثانية لكن فيه راحة مو طبيعة. الذهاب والعودة من نفس المدينة مو سيىء بس يربطك بالرجعه

الأمان في الليل

المدن بالليل كويسة لكن لعامل الامان حاول تتجنب المشي في الطرق الفرعية بالليل واذا حسيت انك بتضيع اطلب اوبر على طول.

حاول تقرأ عن المدينة قبل تروح لها تشوف تاريخها اماكنها مميزاتها. واذا رحت مكان تكتب اسمه بقوقل وتقرأ عنه.. والله تستمتع اكثر.

تعامل العرب في فرنسا

العرب كويسين لكن فيه قلة تخرب على الكثير اللي همه يساعدك او ماعنده مشكله معك. اذا احتجت عربي تراه بيخدمك لكن في حالة التسويق او تقديم خدمات او تذاكر او دخول سريع او وقف بقول لك شي اعتذر منه وكمل طريقك.

التواصل مع السلطات المحلية

في حالة صار مشكلة لا قدر الله لا تقبل على نفسك اطلب السلطة المحلية، السفارة .. الخ على حسب مشكلتك لين تاخذ حقك. الغلط بالكلام او النرفزه اللي بدون ما يلمسك هذي لاترد عليها (لوصارت و ٩٩٪؜ ماراح تصير) لكن لو صارات اعرف انهم عصابة يبون يسحبونك تسوي شي لا تآخذها بمرجلة انت وتورط نفسك الا اذا كنت ملم بالقوانين وعارف كيف تتصرف.

الصرف في فرنسا

افضل شيء استخدم بطاقة العملات انا شريت بكذا بطاقة

بطاقة السفر 1 يورو = 4.31 ريال
بطاقة سفر بلس من الراجحي 1 يورو = 4.3 ريال
كردت كارد 1 يورو = 4.29 ريال
بطاقة صراف حقت بنك عادية ، 1 يورو = 4.39 ريال

خل معاك بطاقتين وكاش احتياط ماتدري وش يصير لك 😁

الكاش نادرا ما تحتاجه لعمليات الشراء. يمكن تحتاجه اذا فيه مخيمات صغيرة يبيعون اشياء محلية وفطاير وكذا نفس السوق الشعبي عدا ذلك البطاقة تفي بالغرض.

بالتوفيق جميعاً

الكاتب: سعود
تليجرام: saaudds@


Booking.com
هل كانت الصفحة مفيدة؟

شارك المقال:

حمل تطبيق المسافرون

كل هذه المعلومات وأكثر موجودة في التطبيق

أضف تعليق