تقرير رحلتي الى المانيا وايطاليا والنمسا لمدة اجمالاً 19 يوم من 10\7 الى 28\7 شاملة التكاليف وتفاصيل كاملة عن السكن من الايجابيات والسلبيات .
العدد : شخصين وطفلين واحد 6 سنوات والثاني 9 سنوات.
تكلفة التذاكر : التذاكر اجمالي 14650 ريال.
الطيران : الخطوط القطرية ترانزيت 5 ساعات في الدوحة متعب شوي لكن لعيون اوربا.
اول ليلة في رحلتي الى المانيا وايطاليا والنمسا: ميونخ
اول ليلة في ميونخ كانت في فندق ارمادا ميونيخ اسرة أربعة اشخاص ب 462 ريال غير شامل الافطار طبعاً جنب المطار حق نووووووووم عقب المطارات وزحمتها.
التوجة الى قارمش
بعد كذا انطلقنا الى قارمش اخذنا سكن في قرية جنبها جميلة جداً جداً فيها زحليقة صيفيه اشوفها اطول وارفع زحليقة ممكن تركبونها يوديك تلفريك مكشوف كرسي خطير شوي ع الاطفال والاحنا ما تعودنا .
السكن في قارمش عن طريق Airbnb واول حجز لي عن طريقة ويعتبر اول مطب اكلناه في الرحلة الشقة صغيرة مره لكن مشت الامور فيها حوش اربع ليالي الليلة 470 ريال. و الاجمالي كان 1880 ريال.
الانتقال الى ايطاليا في رحلتي الى المانيا وايطاليا والنمسا
بعد كذا انطلقنا الى ايطاليا والتجربة الثانية مع Airbnb وهالمرة بيض الوجه التطبيق اخذنا ثلاث ليالي
شقة واسعه واطلالة وسعررررررر جداً مغري وجنبها مطعم بيتزا لكن المنطقة حق استرخاء ولا يوجد فعاليات يعني انبسط بالجو. المكان مرتفع والطريق وعر شوي لكن مناظر يا الله من فضلك. الاطلالة ولا غلطه
عنوان السكن
التكلفة كانت 470 الليلة الاجمالي 1410 ريال كما ان الاقامة كانت جميلة جداً.
الانتقال الى النمسا في رحلتي الى المانيا وايطاليا والنمسا
بعد ايطاليا انطلقنا الى كابرون في النمسا والتجربة الثالثة ل Airbnb وهالمرة جاب العيد وكانت اجمالي الليالي 5 ليالي طبعاً دخلنا كابرون الساعة ٢ الظهر كان الجو حااااار وطلع السكن فوق البقالة العربية و الموقع كان جداً سيء من جميع النواحي كذلك الروائح.
وكانت الشقة صغيرة عبارة عن غرفة وطبعاً حاجز 5 ليالي والحجز للاسف غير مسترد طبعاً المبلغ كان 2900 ريال زعلت جداً على المكان والموقع وكابرون كلها.
بعد كابرون طلعت واتجهنا عن طريق قوقل ماب الى سالباخ وصارت خيرة الحمد لله اخذت ليلة سريعة في فندق حليو لكن ما انصح فيه اسمه فاليري موب زين اخذت الليلة ب800 ريال عن طريق بوكينج شقة غرفتين ومطبخ وحمام اعزكم الله وشور .. وقال اجدد لك ب400 نص سعر بوكينج قلت لا … اخذنا ليلة ومشت. الامور الحمد لله صحيت الصباح الساعة 7 وطلعت ادور حول المنطقة في سالباخ جميلة جداً.
السكن في سالباخ النمسا
حصلت سكن واخذت الليلة ب 650 ريال الاجمالي 3 ليالي 1950 ريال شقة شرررررحة جداً غرفة نوم وصالة كبيره فيها مطبخ وجزء منها سريرين لاطفال وحمام اعزكم الله وشور …
اسم الشقة Share جداً انصح بها للسكن وتوفر تذاكر لتلفريك سالباخ مجاناً وعندهم غسيل ملابس بدون كوي.
الانتقال الى زيلامسي النمسا
طبعاً من سالباخ الى زيلامسي 20 دقيقة والمرة ذي انا مريت زيلامسي ع السريع زحمه وما جلست فيها ابد
ومن سالباخ لبحيرة هنترسي 40 د جميلة جداً وحقت قهوة عصرية.
انتقلنا بعد كذا الى اقليم تيرول وتحديدا وادي زيلرتال وتحديداً قرية قريبة جداً من جينباخ وطبعاً 10 د من بحيرة اخن سي وقرية بيرتساو فيها تلفريك الطبيعة سعرة 80 يورو 4 اشخاص كذلك قطار بخاري 84 يورو 4 اشخاص خصوصاً اذا كان الجو غائماً التجربة تكوووووون جميلة حداً
السكن شقة غرفتين نوم ومطبخ وحمام اعزكم الله وشاور يغسلون الملابس مع الكوي غسلهم وسط وسعره عااااالي …
السكن اعطيه 9من 10 وينرجع له باذن الله اخذته منهم مباشرة فرق عن بوكينج 400 ريال في الثلاث ليالي ..
سعره 590 ريال الليلة الاجمالي 1770 ريال ..
الانتقال الى سالزبورغ النمسا
بعد زيلامسي توكلنا ع الله وانطلقنا ل سالزبورغ المدينة الجميلة جداً اول مره نزورها ونجلس فيها اخذنا فيها ليليتين من اجمل المحطات. سكننا في فندق أركوتيل كاستيلاني جميل جداً اخذنا جناح غرفتين شرح ونظيف ومكيف لكن يفصل احياناً. اجمالاً تكييفه زين فيه بار في الاستقبال بعضهم سبه في التعليقات لكن ما شفنا منه اي مشكلة الحمد لله.
سعره ليلتين 1800 ريال الليلة 900 ريال ل الليلة الواحدة لكن يستاهل. كما يبعد عن المدينة القديمة 10 د على مشي رجولك.
سالسبورغ جميلة وفيها المدينة القديمة والنهر وميزتها في التمشية ع رجلينكم بس لازم يكون الجو غيم أو مطر.
كذلك فيها مطعم تاج محل هندي جميل واكله لذيذ.
الاوت لوك صغير لكن جميل وجاز لنا مررررره وبضاعته كويسه واسعاره زينه مسافة 15 دقيقة من السكن
ميونخ اخر محطة في رحلتي الى المانيا وايطاليا والنمسا
واخيراً كانت عودتنا الى ميونخ قبل العودة الى ارض الوطن اخذنا اخر ليلة في فندقنا الاول في مطار ميونخ فندق ارمادا ميونيخ
في الختام كان هذا تقرير رحلتي الى المانيا وايطاليا والنمسا اتمنى اكون قدمت فيه فايدة تنول رضاكم ،،،، شكراً