أولاً شكر لكل من يساهم في نشر الفائدة، الحمد لله من قبل ومن بعد، انتهت تجربتي في قطر بعد قضاء اربع أيام استمتعنا فيها كثيرا. هنا اشارككم رحلتي الى قطر مع بعض الملاحظات:
اليوم الاول في تجربتي في قطر
طبعا حجز الفنادق كان عن طريق بوكنق وبسبب سرعه القرار في التوجه الي قطر ولأول مره ازورها حجزت اول يوم فندق إزدان الدوحة يقع في منطقه الأبراج وقريب من كل شي اقل من خمس دقايق وانت ف سوق واقف والكورنيش.
الفندق اقيمه اكثر من عشره وسعر الغرفة حدود ٢٥٠ كانت وندمت اني ما حجزت اكثر من يوم لما جيت امدد من الفندق اغلى.
زيارة سوق واقف ومشيرب:
توجهت اول يوم الى سوق واقف بعد العشاء بسبب وصولي المتأخر وتعرفون تعب الخط كيف. وجبه العشاء كانت في مطعم بسطه حلو واسعاره متوسطة والتوجه سيرا بالأقدام الى مشيرب.
وطبعا من كبر السوق ضيعت المواقف حاولوا تنتبهون ف النقطة ذي لان المداخل والمخارج من تحت عندهم.
اليوم الثاني
ثاني يوم انتقلنا الى فندق وأجنحة جلوريا الدوحة قريب من كل شي الكورنيش والسوق جميل جدا جدا انصح فيه. اولا بسبب السعر حدود ٢٣٠ الليلة ويتساهل اكثر صراحه. ثانيا الفندق فيه كل ما تحتاج واطلاله ولا أروع ومسبح
بعدها توجهت لمطعم اسمه كايلاش بربات ينقسم الى قسمين هندي والقسم الثاني فقط خضار جميل ولذيذ جدا ورخيص. اربعه أصناف تقريبا ميه وشي
زيارة ميناء الدوحة و درب لوسيل:
توجهت بعدها الى ميناء الدوحة القديمة اول شي قابلني فود ترك الملونة وكانت سعر اليخوت هناك مرتفعة حدود 600 ريال. انتقلت لمكان ثاني جهة المباني لقيت يخت الشخص ٤٥ ريال وركبت رحله جميله كانت.
بعدها تمشينا ف المنطقه ثم الانتقال لمنطقه درب لوسيل للاسف ما فيها شي الا مشي وتعب ما عجبتني. جدا هدوء وما في فعاليات مثل الي شفنا ف الصور. بعد كذا رحت لمنطقه فود تركات في مطعم عندهم برجر لذيذ جدا جدا اسمه جست لوف
تعشينا وانتقلنا للكورنيش لفه.
اليوم الثالث :
سوق وقف وكتارا وفيلاجيو مول:
توجهت على بعد العصر الى سوق واقف وطلبنا من مطعم زعتر وزيتون سندوشتات وبيتزا وكان لذيذ وسعره ما عدى ميه وخمسين ريال.
انتقلت بعدها لكتارا دخلت الأطفال بيت الهديه اتوقع اسمه اولا اولا جميل وممتع وتجربه فوق الخيال انبسطو فيها كان رسوم الطفل ١٣٥ ويلعب كل شي والمرافق مجانا والإضافي ب ٤٥. بعدها دخلنا منطقه كتارا وتمشينا الشارع كان بارد بسبب وجود المكيفات ف الأرصفة ماشا الله. ومشينا لمن الكورنيش في مطاعم كثيره حوله صراحه كان جدا متعب ف المشي وماطولت فيه
بعد ذلك انتقلت الى مول فلاجيو وركبنا القارب بسعر عشره ريال لكل شخص. وللأمانة كان صدمه السعر توقعت اغلى كان روعه والمول ممتع جدا لتسوق.
بعد كذا انتقلت لمنطقه مطاعم كان الوقت متأخر وما لقيت الا هي من قوقل ماب منطقه عند نادي السد القطري. مطعم كرك غلام كان لذيذ جدا ورخيص حدود ميه وعشرين.
اليوم الرابع:
زيارة سوق الوكرة
اليوم الرابع توجهت لفندق ذا تاون الدوحه حجزته ب ٢٠٠ ريال الغرفة جدا رائعة لكن لا يوجد اطلاله الا ع فندق ثاني المواقف ضيقه والاصنصير واحد بس.
توجهت من بدري لسوق الوكرة المركز الجنوبي البازار بكتشف وش عندهم كان المسافة تبعد نص ساعه تقريبا من الدوحة. تجربه حلوه لكن ما انصحكم فيها ما عجبنا كثير كلها اثاث وكماليات في عندهم السوق الشعبي روعه.
منطقة كارتييه
بعد كذا ردينا وتوجهنا لمنطقه كارتيه وكانت الصدمة لنا ما شاء الله كني في مدينه أوربية. تمنيت اني رحت بالنهار كان طلع احلى. طلبنا اكل من مطعم مكسيكي مستر تاكو اسمه اظن ما عجبني ابدا. والسعر اربع أصناف عباره عن سندوتشات وفاهيتا وبطاطس طلع حول 240 ريال.
مرسى ملاذ كمبنسكي – مول فاندوم
بعدها رحنا على مرسى ملاذ كمبينسكي هو فندق وفيه شاطيء وحسيت نفسي فدوله أوربية لان الوحيد العربي بينهم. وكان مطاعم وكافيهات حول البحر ودخلت قلت اجرب الحلا وطلبت اسكريم بس وقهوه كانت اسعارهم غاليه جدا لكن المكان رائع وتوقعت انه مكان خاص من جماله.
رحت بعدها مول فاندوم رائع جدا ونوافير راقصه وقلت نجرب كوفي هناك فوق شفته وكان رائع الحمدلله وحاسبت يمكن ب ٦٠ نوع حلا وقهوه.
وبعدها لضيق الوقت ابي كنت السوق رحت سوق الجبر قريت عنه وكان مقفل اغلب المحلات لكن لحقت على محلين الحمد لله.
بعض التنبيهات من تجربتي في قطر
- انبهكم على شي الي حجز عن طريق بوكنق من صرافه الراجحي انحجب علي المبلغ المتبقي ف رصيدي وقالو ماتقدر تستخدمه الا بعد عشر ايام
- ثاني شي سفرتي كانت بدون تخطيط ومبلغ كامل معي خمسه الالف وجيت بالسياره
- اقروء عن الفنادق وانصح ف منطقه الابراج صراحه حلوه وقريبه من كل شي ونظيفه الفنادق. يعني لاتشوف السعر رخيص وتقول ماهو صح والله اني مصدوم من الاسعار ولو الواحد حجز من بدري بيرتاح
في الأخير الحمد لله انتهت تجربتي في قطر الجميلة أتمنى أكون قدمت تغطيه كامله.
Booking.com