#16088

وعليكم السلام

مبروك عليك الزواج يا بعدي ووالله يوفقك
وإن شاء الله تستانسون في رحلتكم ووقت سفرك راائع جداً ماشاء الله

وقبل كل شيء لازم تقرأ كثيييير ولا تستهون تجارب الاعضاء لان فيها فايدة تهممك

طبعا اذا انت بتحجز ذهاب ميونخ وتبي سويسرا بنفس الوقت
الافضل تحجز العودة من جنيف

يومين في ميونخ ( طبعاً انت عريس ومايحتاج انك تتهجول بعد الرحلة وتمسك خط )
وأنا أفضلك هذا الفندق Eurostars Book Hotel
بصراحة أنا ارتحت فيه جدا من ناحية الموقع ونظافة الفندق والمعاملة الحسنة وقريب من كل شيء

تنزل على زيلامسي وتاخذ فيها اربع ايام
انا سكنت في فندق Grand Hotel Zell Am See تقريباً ليلته بـ 1100 ريال واللي يميز هالفندق موقعة القوي
لكن يمكن يناسبك ويمكن لا … وبصراحة ما أقدر أفتيك في غيره هناك

وزيلامسي فيها أماكن رائعة كثيير
قمة كابرون الثلجية تبعد عن زيلامسي أتوقع أقل من 10 كيلو
خوانق سيغموند ثون خياال
طريق جروس جلوكنر وتمشي بسيارتك في طريق ثلجي رااائع
شلالات كريمل تبعد عن زيلامسي حوالي 40 كيلو
الزحليقة الصيفية قبل ما تدخل زيلامسي ,, ناسي بكم كيلو قبلها بس قليل جدا
وفيه أماكن رائعة كثير ماهي بذاكرتي الان يمكن يفدك الاعضاء فيها

وبعدها دق سلف على سويسرا وروح اسكن في قرية هايدي ( ماينفيلد ) خذ ليلة فيها
لانها تبعد عن زيلامسي حوالي 400 كيلو ( طريق في قمة الخيال ) وبنفس الوقت اطلع للقرية وادخل بيت هايدي
وأنضف فندق هناك تقريبا هو Swiss Heidi Hotel 

وشد الرحال على انترلاكن قلب سويسرا
وخذ فيها 4 أيام
وأنا سكنت في فندق Goldey Swiss Quality Hotel ليلتين وكان موقعه مطل على النهر رووعة
واخذت ليلتين في فندق Neuhaus Golf- & Strandhotel انتبه لاتسكن فيه لانه سيء وندمت اني سكنت فيه

ما اقدر افيدك في فنادق غيرها لاني ماقد جربتها يا بعدي .. ان شاء الله يفيدك غيري فيها

ممن انترلاكن تقدر تروح البحيرة الزرقاء وتروح قرية زيرمات وعندك قمة جينفروباخ وعندك 3 شلالات رائعة
أنا رحت منها واحد اللي هو شلال جس باخ وكان أشبهه بالخيال من روعتة سبحان الله
فيه أماكن كثيرة تقدر تروحها من انترلاكن راح تعرفها مع القراءة

وشد الرحال على ديفون الفرنسية ( تبعد عن جنيف حوال 10 كيلو )
خذ فيها 3 ايام ( الاخيرة ) طبعا ديفون صغيرة ومافيها شيء الا البحيرة
بس ليش اخترتها لك ؟
بسبب قربها من جنيف لان لو سكنت 3 ايام في جنيف بتكلفك كثير لكن في ديفون رخيص جدا بالنسبة لجنيف
ارجحلك هذا الفندق Park & Suites Prestige Genève Divonne Les Bains
رائع ونظيف

تقدر تروح منها لجنيف في ليلة … وتروح آنيسي الفرنسية الرائععععة في ليلة
واليلة الاخيرة تجهز للسفر وعودا حميدا ان شاء الله

يعني عندك
2 ميونخ
4 زيلامسي
1 ماينفيلد
4 انترلاكن
3 ديفون

لكن اذا كنت من محبي الالعاب والملاهي لازم تروح اوروبا بارك

2 ميونخ
4 زيلامسي
2 زيورخ الافضل تسكن في رامادا لانه نظيف وسعره مناسب .. تنطلق منها على الغابات السوداء وتروح اوروبا بارك
تستانس هناك ثم ترجع زيورخ أو ( تاخذ ليلة في زيورخ ترتاح من السفر وتاخذ ليلة في قرية رست اللي فيها اوروبا بارك )
4 انترلاكن
2 ديفون
العودة من مطار جنيف ( تسلم سيارتك في الموقف المخصص لها وتروح المطار وتركب طيارتك ) اذا تبي تفصيل لها ابشر بعزك

طبعا أفضل وسيلة تنقل السسسسيييييييييييياااااااااااارة راح تدعيلي وقتها ( لا تدعي علي تكفى هههه )
احجز سيارة اونلاين من يوروب كار ولا أفيس وامورك تمام

وهذا اللي عندي يا بعدي وإذا تبي أمور ثانية أبشر بعزك أو تبي تفصيل لمطار ميونخ أو جنيف من ناحية استلام السيارة وتسليمها أو امور اخرى .. مابقصر معك باللي عندي … وأعذرني إذا فيه تفقيع بالمخطط ههههههه ولا إذا فيه كلجات لاني أكلج كثير 🙂

وأي شيء تامر عليه أنا بخدمتك يا عريس 🙂