ام مبارك الكويتية..في اوزنقول التركية

السلام عليكم و رحمة الله و بركاته

بداية أتقدم بالشكر الجزيل لهذا الصرح الكبير منتدى العرب المسافرون الذي جمع لنا أهم المعالم السياحية فالعالم
و أصبح منتدى عشاق السفر و التوثيق..فعلا ابرز هذا المنتدى أهم معالم الجمال في كل دوله..

و لا أنسى أن اشكر كل من ساعدني إما بتقريره أو بجوابه على استفسار معين..
و الأخوة في البوابة التركية

الدوسي ومحيرني النقل و هابي فيس
و عبداللطيف الشامي (اللي كان له موقف طيب معانا في مطار طرابزون جزاه الله عنا كل خير)
و الى جميع الاخوه اللي ساعدوا بالاجابة على استفسار و قدموا تقاريرهم لخدمة اخوانهم.

و أنا اعرف أن هذا الموضوع لا يرقى بمستوى تقرير و لكن يمكننا أن نطلق عليه موجز للرحلة

اكتب هذا الموضوع بمثابة رد جميل لهذا المنتدى و عسى أن يستفيد منه أي شخص حتى و لو بشكل بسيط

بالنسبة لرحلتي كان الهدف منها النقاهة و الاستجمام فقط و ليس السياحة و الاستكشاف
بعد مشوار طويل من الدراسة و العمل في وقت واحد كانت هذه الرحلة للراحة و لأخذ النفس و استعاد النشاط لبداية مرحلة جديدة في الحياة.
فكان الهدف هو مكان جميل هادئ بعيد عن الحداثة أو التدخل البشري (بكل بساطة أبي خضرة و شلال و استكانة شاي وصفاء الذهن و تأمل بالطبيعة فقط)

كان الهدف بكل بساطه هو البحث عن الطبيعة المجردة

بحثت كثيرا ً عن بقعة بهذه المواصفات
فكانت تركيا هي المطلب و اوزنقول هي الهدف
نعم فمن التقارير عرفت أنها بقعة جميلة بطبيعتها أهلها بسطاء محافظين بسيطة في مرافقها بعيده عن المدنية
فعزمنا أن تكون الوجهة إلى اوزنقول و توكلنا على الله.:11ight:

تم حجز تذكرتين (انا و الوالد) على متن طيران الجزيرة و لحسن الحظ كان فترة عرض و خصومات
فحصلنا على تذكرتين بسعر 148 د.ك:101:

و من خلال المعلومات اللي حصلت عليها من تقارير الأخوان
بحثت بشركة النور لكن للأسف لم أجد وقت مناسب و بنفس المطار ألا و هو مطار صبيحة
فاتجهت إلى الطيران التركي و لله الحمد تم حجز تذكرتين بسعر 92 د.ك

اليوم الأول

فكانت البداية يوم الأحد
التاريخ: 14\6
الرحلة : J9 0478
الوقت: 7:10 صباحاً
الوجهة: اسطنبول
من مطار الكويت الدولي – إلى مطار صبيحة الدولي في اسطنبول

خذينا تاكسي من البيت إلى المطار الساعة 5 الفجر
سوينا البوردنق و دخلنا الجناط
و قعدنا ننطر الرحلة

الساعة 6 و 45 دخلنا الطيارة و مشت الرحلة فضل الله تمام التمام

و هذي صورة طفلة كانت قاعدة جدامنا جميلة و حبوبة لكن مزعجة اشوي خخخ :112:

مدة الرحلة 3 ساعات طبعا طقيتها نومة  لأني كنت مواصلة ليلتها ما نمت لأداء امتحان خاص بالجامعة
و هذي مناظر من نافذة الطائرة

وصلنا مطار صبيحة الساعة10 و نص تقريبا
هذي لقطة للمطار من الطيارة

أول ما دخلنا لقينا كشك على اليمين للفيزا
سوينا فيزا قيمة 20 دولار لكل شخص
رحنا للجوازات ختمناها و طلعنا بكل سهولة:24:

الحين كان المطلوب نعرف وين المطار الداخلي:114:

طبعا دخلنا عشان نترجم و نفهم الناس
بالاخير فهمنا ان نطلع من باب المطار و ناخذ يمين في مبنى ثاني و هو المطار الداخلي
رحنا و شفنا الرحلات و شيكنا على موعد رحلتنا و تأكدنا انها الساعة 5 العصر
طيب الحين الساعة 11 و 22 دقيقة
شنسوي؟؟ و وين نروح؟؟

لحسن الحظ لقينا كافتريا فالممر اللي بين المطارين قلنا نريح فيها و نتغدا انا طلبت وجبةهمبرجر ب16 ليرة و الوالد طلب كفتة ب14 ليرةو طلبنا 1كولا مع صحن شبس طلع الاجمالي 43 ليرة

بعدها طلب الوالد بيالة جاي ب 5ليرة
هذي اللافته اللي كانت مقابله للكافتيريا

طيب ريحنا نبي نصلي رجعنا دخلنا المطار ندور مصلى بعد ما توضينا
و بعد السؤال عرفنا مكان المصلى ان بالطابق العلوي

و هذي صورة من الدور لارضي

المصلى من الداخل

و مصلى الرجال على يمينه بعدة امتار

بعدها ريحنا بساحة امام المطار كلها شجر و زرع ريح الوالد اشوي و انا جلست اتأمل الجو العجيب
بعدها رحنا لكفتيريا مجاوره للي تغدينا فيها و طلبنا جاي حسب لنا البياله ب3 ليرة
عقب ما مخخ الراس على الجاي التركي دخلنا المطار الداخلي
وبانتظار رحلتنا

طارت الطيارة الساعة 5 و 10 دقايق
وصلنا الساعة 6 و ثلث
و هذي صورة لطيارة السن اكسبرس بعد النزول.

و هني ناخذ الجناط (الشنط) قبل الخروج من المطار.

طبعا لما طلعنا من المطار رحنا نسأل عن الباصات الحين الساعة 7 مساءاً
قالوا لنا اهل التاكسي مافي باصات لاوزنقول:105:

طيب ودونا شركة المترو اللي عرفنا عنها من خلال اجوبة الخبراء على اسئلتنا
قالوا يوك مترو يوك باص:112:

يعني مافي قالوا ان في مشلكه و ان مافي باصات عرفنا ان السالفه بداية نصب
قلنا طيب بجم تودونا لاوزنقول قالوا 170 ليره
غير هالكلام ؟؟:110:

مافي مع الاخذ و العطاء اخر شي 150
شفنا شرطي رحنا نبي نسأله عن الباصات و لا راعي التاكسي سبقنا له
مدري اشقال باذنه
يوم سألناه قال ماي باصات ما عندكم الا هالتكاسي:105:

امرنا لله:110:

طبعا وصلنا بالمكاسر الى 140 و الوالد كان مصر على 120 فقلت خلاص مشها لهم 140 خلنا نروح
توكلنا على الله
و مشينا من طرابزون الى اوزنقول و المسافه تقريبا 120 كيلوا متر
هذي لقطات من الطريق

بعدين بدت تظلم الدنيا فوقفت تصوير

وصلنا تقريبا الساعه 8 و45
رحنا دايركت لانصار و احنا كنا مكلمينهم قبل فالكويت غرفة لشخصين ب50 دولار
يوم وصلنا لهم قال ب180 و الجو ليل و مطررررر و بصراحة برررد:112:

فالوالد عصب قال ليش غيرتوا كلامكم و اللي متاح حاليا لاشخاص اكثر يعني من 3 و فوق
و احنا 2 بس انا و الوالد:114:

المهم في شخص سعودي جزاه الله عنا كل خير :x1:
عطانا كرت قال روح عند المسجد في غرفتين و مطبخ و حمام(تكرمون) ب 60 ليرة
و طبعا فالليل و مطر و قفنا عند انول اوتيل قالوا لنا ب80 ليرة و غرفة صغيرة حيل
طلعنا و مشينا الناس كلها نايمه
في بانسيونات بس الناس نايمه محد يرد علينا
و بدا راعي التاكسي يضجر

المهم لقينا بانسيون و عقب الصراخ و المنادة قامت العجوز
و طبعا ياله بالاشارة مع راعي التاكسي و الظاهر راعي التاكسي قام يحن عليها عشان يفتك منا خخخ

المهم
شفنا شقة غرفتين و حمام و وحده من الغرف اشوي كبيره فيها مطبخ ضنينا انها هي اللي كان يقصدها أخونا السعودي و بنفس السعر اللي قاله ب60 فتأكدنا انها هي (لكن فالحقيقة لم تكن هي المقصودة).
كل غرفة فيها سريرين يوم شافتنا اثنين قامت صكت وحده من الغرف و اقفلتها خخخ ما قلنا شي سكتنا بس نبي ننام:36_1_50:
هذي صور الشقة (خذيتها ثاني يوم لان يوم الوصول كنا خلاص هلكانين

نزلنا اغراضنا و الوالد عطا راعي التاكسي 150 ليرة يعني زيادة 10 ليرة على الاتفاق عشان وصل الجناط فوق لباب الشقة.
و طلبنا من صاحبة البانسيون كنابل(بطانيات) من البرررررد و جابت لنا جزاها الله خير
و نزلنا رحنا لفندق آنول تعشينا فيه وجبتين ستيك تجي مع العيش قيمتها الاجمالية 17 ليرة .
رجعنا نمنا بعد يوووووم متعب.

و هذي لقطتين من نافذة الشقة

***

اليوم الثاني
15\6

صباح ثاني يوم كان بمثابة الصدمة بالنسبه لي :110:

لاني شفت جنة الله في الأرض:24:

خضاااااار و صوت الماي يجري شي عجيب

طبعا الصدمه ناتج عن اني جيتها فالليل فما شفت الجمال و لا هالروعة الا الصبح خخ 

بعد ما سوينا ريوقنا (الفطور) و افطرنا و عينا من الله خير
اتصلنا على مكتب الحران نشوف الغرفه اللي قالوا لنا عنها انها في ايجون
توكلنا على الله نستكشف المكان و المنطقة

بعد التمشي المهم رحنا صوب ايجون موتيل و شفناها و ما عجبتنا لانها ضيجه حيل
يا دوب تكفي السرير .. الواحد فيها يالله يتحرك
و هذا اللي لاحظته في اغلب الاكواخ و الفنادق اللي هناك الغرف حيل ضيجه؟؟ و صغيرة؟

المهم للمعلوميه و الافاده الكوخ اللي لقيناه في ايجون غرفة لشخصين مع حمام تكرمون ب100 ليرة مع الفطور.
و هذي جم لقطة للبحيرة من بعد ما طلعنا من ايجون

و بعد التمشي على البحيره

جا وقت الغدا
في مطاعم في المنطقة اللي بين المسجد و البحيره

دخلنا واحد منهم و طلبنا وجبتين كفتة و صحن شبس و بعد الغدا طلب الوالد شاي اجمالي الفاتورة كانت 26 ليرة.

هذي صورة للغدا

و احنا في طريقنا للشقة مرينا فندق آونال (مقابل المسجد بينه و بين المسجد جسر) اللي تعشينا فيه امس قلنا نسأل ثاني مره عن الغرف
المهم لقينا بنت حبوبه حيل اسمها ريحانه و معها عمها بالريسبشن اسمه مصطفى و ابوها الشيف العايله حيل حبوبه و مضيافه
المهم رحنا معاها فوق نشوف الغرف
ورتنا غرفة صغيره حيل قالت هذي بدون افطار 60 ليرة و غرفة ثانيه اكبر اشوي ب90 ليرة بدون افطار
و كلهم لهم بلكونه على البحيره مباشرة
المهم خلاصة المكاسر و نقاش الوالد خذينا الكبيره ب60 ليرة مع الافطار
اتوقع انهم تساهلوا لان الوقت اللي احنا جايين فيه مفيه سياح بكثره فعشان جذي تساهلوا
المهم اتفقنا ان نجيهم باجر
و كملنا طريجنا للشقة و الا هذا مكتب بيبع تذاكر باصات لطرابزون :24: التذكره ب10 ليرة للشخص

طبعا فرق عن ال150 ليرة :112:.. و لقينا تكاسي و المشوار من اوزنقول الى طرابزون ب120 ليرة:cool:

و بدا البررررررررررررد يزيد و المطرررررر:110:

فرجعنا بسرعة للشقة :bounce8:

و سوينا شوربه طبعا الوالد جزاه الله خر كان جايب بعض الاغراض لان حاسب حساب مطبخ خخخ :24:

و قعدنا على الجزيرة لين جانا النوم و نمنا..

***

اليوم الرابع
17/6

قعدنا الصبح تقريبا على الساعه 8
هذي لقطتين خذيتهم قبل لا ننزل تحت نتريق(نفطر)

 

بعدها نزلنا تحت للمطعم

هذا فطورهم
بصراحه عجبني :24:

بعدين عرفنا انهم يسون الشكشوكه (بيض و طماط و بصل):109:
فطلبناها و كانت من ضمن الافطار يعني ما حاسبونا عليها …

و هذي لقطه ثانيه مع الانسه شكشوكه 

 

طلعنا الساعه 9 نتمشى
و طبعا بدت كامرتي تتنفس ..
:101:

هذي صوره للبحيره من على الجسر

و هذه لقطه للبيوت اللي خلف المسجد ..

بعدين قررنا نتمشى بين البيوت اللي خلف المسجد صعودا

فكانت هذي بعض من مداعبات كامرتي لطبيعة الحبيبه اوزنجول من اعلى..

طبعا بعدين نزلنا عن طريق الممرات اللي بين الحقول

و تمشينا بين المحلات ..
بعدها حسينا بالتعب قلنا نروح نريح بالفندق

جت الساعه 2 تقريبا نزلنا لمطعم الفندق عشان نتغدا
الوالد طلب شرائح دجاج و انا صحن كفته بعدين قالت لنا الرسبشن ريحانه ان عندهم شي اسمه ايدام
فقلت نجربه فطلبناه
طلع مرق فاصوليا بلحمه ..كان لذيذ بصراحه
حسابنا طلع 21 ليره تقريبا 7 ليرات لكل طبق :24:

هذا غدانا

صعدنا فوق الوالد يبي يريح

بعدين حسيت ان الوالد تعبان اشوي يمكن من المشي والصعود لاعلى
و طبعا الوالد من طبعه يكابر وما يبيّن انه تعبان
انا حسيت ان تعبان فقلت له اليوم بقعد فالبلكونه تعبت من مشوار الصبح و التمشي
احس تعبانه فخلنا نقضي باجي اليوم فالفندق
هو شك فالبدايه و قال انا مو تعبان 
قلت ادري ادري .:110:.انا اللي تعبانه و مافيني شدة اتمشى .خلاص ابي اريح
و لله الحمد اقتنع :24:

مشكلة الشياب اللي يعاندون :112:

و ارتاح الوالد و انا قعدت فالبلكونه اشوف الناس رايحه راده و السياح الباصات
جو حلو بصراحه
طبعا شفت انها فرصه امارس هوايتي الفاشله التصوير :109:

اطعام البط

 

بعدين بدأ الضباب ينزل ..

(اللهم اعز الاسلام و المسلمين في كل مكان ..اللهم امين)

و طبعا في هذه الاثناء الوالد طاقها نومه لان على كلامه مو تعبان
مشكلة الشياب اللي راسهم يابس

ظلمت الدنيا
كليت من الخرابيط و الحلويات …فقلت ما ابي عشا
الوالد طلب صحن سلطه ب6 ليرة جابوه الى الغرفه :24:

بعدين كان في اعاده لمباراة اسبانيا و العراق اذا ماني غلطانه بطولة كأس القارات؟؟

و اسبانيا هي اللي فازت

بعدها نمنا…

***

اليوم الخامس
18\6

تريقنا في الفندق و طلعنا نتمشى على البحيره و منها نروح الى جهة فندق انصار و المحلات اللي عنده

قعدنا على البحيره نستمتع بهالجو:24:

و احنا نتمشى لقينا ضفدع:109:

بعدين رحنا للمحلات نشتري هدايا للاهل
بنهاية الفنادق اللي عند انصار
لقينا فندق و عنده اعلام الخليج
رحنا نشوف الفندق :11ight:

طلع هادي و مافي احد الا جم شخص
و لقينا عنده احواض تربية الاسماك

تقريبا
جت الساعه 3
جعنا:110:
فرحنا انصار
و جربنا عندهم اجنحة الدجاج المتبله المشويه

عجيبه عجيبه عجيبه

خذينا طبقين + سلطه =21 ليرة

بعدها ردينا و وصلنا احد اصحاب المحلات اللي شرينا منه و كان اسمه رجب و خذانا على طريجه للمسجد
لان فندقنا عند المسجد

رجعنا تعابه من التمشي
فقلنا نكمل باجي اليوم على البلكونه

انتهى خامس يوم

***

اليوم السادس
19\6

اليوم تريقنا في الفندق
و صعدنا فوق لغرفتنا نلم اغراضنا و نصك جناطنا
لان الوالد لقى شقة من غرفتين و مطبخ و حمام و بلكونه واسعه و و حلوه
على بعد اقل من 110 متر من الفندق تقريبا
صاحب البانسيون اسمه اسماعيل
و كان الوعد معاه الساعه 12
زهبنا اغراضنا و رحنا للبانسيون
البانسيون دورين
عباره عن 4 شقق صغيره فالدور الارضي
كل شقه عباره عن غرفتين تفتح على بعض +حمام (عزكم الله)+ شوله صغيره (طباخ ) بزاويه احد الغرف
و هذي لقطه خذيتها للشقق اللي بالدور الارضي
طبعا على السريع لان كنا صاعدين فوق لشقتنا

مثل ما تشوفون غرفتين مفتوحه على بعض.و اخر شي تفتح على حمام(تكرمون)
الدور الاول
عباره عن شقتين كبار
شقه لصاحب البانسيون و شقه احنا استأجرناها
الحين نشوف شقتنا اللي خذيناها و هي عبارة عن غرفتين وحده منهم كبيره
+حمام عزكم الله+مطبخ مستقل +بلكونه=60 ليرة
اول ما فتحنا الباب
نشوف هالممر

بعدين
يجي على يساركم المطبخ

بعدها بمتر تجي على يمينكم غرفه بسريرين+ خزانة ملابس

بعدها بشوي يجي على يساركم الحمام عزكم الله

بعدها ينحني الممر باتجاه اليمين<<اتجاه اجباري

ينتهي الممر بغرفة كبيره
فيها سرير لشخصين و سريرين لشخص
طبعا تلفزيون و قنفة(كنبة)
نشوف الغرفه و واضح فيها باب يودي للبلكونه

و هذي البلكونه

و هذي جم لقطه من البلكونه

هذا حقل صاحب البانسيون

نلاحظ لافتة البانسيون

و هني عن قرب

و صاحب البانسيون معروف باسم اسماعيل كوكج

بعد هالتعب و شيل الجناط و ترتيبها:36_1_10:
رحت اشوف المطبخ
و الوالد راح يجيب لنا لحم غنم طبعا داخ على ما عرفنا اسم القصاب عندهم اخر شي طلع
اسمه مثل ما نقول قصاب خخخ
هذا اعلانه

هذا المحل

يقول الوالد لقى كيلو اللحم بدون عظم ب20 ليره
و مع العظم ب17 ليره
طبعا خذا لنا كيلو بدون عظم ب20 ليره
و بعدها مر الوالد على السوبر ماركت عشان يدور لبن
طبعا عرف منهم ان اسمه عيران او آيران

بعد ما جاب الوالد الاغراض
ام مبارك شافت شغلها
و الوالد كان يبي جبسه سعوديه(كبسه سعوديه)
و بعد ما خلصت الجبسه كانت هذه اللقطه بس رجاء بدون ضحك

بعد ما شبعنا و لله الحمد:36_1_51:

و بعد ما ريحنا اشوي
كان لنا موعد مع غوري شاي نقعد فيه الراس:24:

…
بعدها حسينا فالبرد اشوي و بدت درجة الحراره تنزل
و بدا الضباب ينزل
فقلت اطلع اخذ جم لقطه:101:

بعدين بدت تنزززل درجة الحراره اكثر

و بديت احس فالبرررررررد
فدخلت داخل
و تأكدت من شعوري فالبرد لما شفت الوالد

و هذي لقطه فالليل

و تصبحون على خير
انتهى اليوم السادس

***

اليوم السابع
20/6
قعدنا من النوم و تريقنا و عينا من الله خير

نزلنا ندور تاكسي يودينا لسلطان مراد
الاغلبيه قالوا 120 ليرة:112:

لقينا واحد اسمه محمد علي قال ب90 ليره 

و لقينا شعبان ب80 ليره 
طبعا اتفقنا مع شعبان (الارقام راح احطها في نهاية التقرير مع الكروت)

توكلنا على الله الساعه 10 و نص
طبعا مع الاسف ما صورت اثناء الطريق لاننا حسينا بالتعب اشوي الظاهر من اختلاف الضغط
و بصراحه كنت خايفه على الوالد لان اثناء صعودنا بدا قلبه يتعب و ضغطه بدا يختلف و ياثر على راسه
فكنت مشغوله اشوي بالوالد ..و ما كنت صوب التصوير

لكن ما ان وصلنا الى اعلى الجبل ..بدأت رحلتي مع الكاميره
اترككم مع الصور..

قطيع من البقر..

و هذي مقبره مرينا منها..اللهم ارحم امواتنا و اموات المسلمين..

و هذا تجمع لفندق و مطاعم و بعض المحلات..

..نتابع..

طبعا من تعب الصعود ما قدرنا نتغدى ..لان الصعود لعب فالجبد .:11ight_li
هذه احد المحلات..

.
جلسنا بالمقهى..

و هذي بيالة جاي مع طبيعة سلطان مراد..

نستكمل الصور..

بقايا ثلج…:24:

مستوانا بالنسبة للغيم..:110:

الوضوء بمياه طبيعية جبلية ..اكيد له طعم اخر..و شعور خاص ..

اموووووووووووووواج من الغيم…(كأنني على ساحل بحر و تلك امواج البحر..ولكن طبعا باختلاف الارتفاع..)

اثناء النزول من الجبل وقفنا شعبان عند زاويه…خلابه..

كانت هذه الزاويه عش لهذا الشلال..

لقطه اثناء العوده..

وصلنا لبحيرتنا الغالية..

مشينا باتجاه مطعم انصار..عشان نتغدى

و هذي لقطه من الجسر..

تغدينا عند انصار
3 وجبات اجنحة متبلة مشوي (1 لي و 2 للوالد لان كان لاعب فيه السكري..) +شبس+بيبسي+شاي=32ليرة

قضينا باجي الوقت بالتمشي بين المحلات اللي عند انصار..

و بعدين رجعنا نتمشى عشان نهضم ..
و قعدنا على البحيره .. الى ان غابت الشمس..

رجعنا الشقة..نريح
و صورت الفراوله الموجوده في حقل صاحب البانسيون..

..
يوم جت الساعه 9
نزلنا رحنا لفندق آنول نسلم عليهم و نتعشى عندهم
طلبنا كفته+سلطة+شبس+بيبسي=20 ليرة

و انتهى يومنا السابع

***

اليوم الثامن
21/6

اليوم اغلبه كان بالشقه ..:110:

لان الوالد الله يحفظه كان تعبان من مشوار امس لسلطان مراد..

فكان يحس ان الضغط عنده مو طبيعي..و صداع..

فقلت مو مشكله

رحت ضبطت الجاي و قعدت فالبكونه برفقة كتاب (رجال من التاريخ)

للشيخ:علي الطنطاوي الله يرحمه

رابط تحميل الكتاب

اضغط هــنــا
..

و هذي سوالف الكاميره من البلكونه

اليوم التاسع
22/6

نزلنا تقريبا على الساعه 9 الصبح نتمشى :11ccer:

الظاهر الوالد كان يعاني من بعض الالام في قدمه و لكن طبعا و كالعاده لم يصرح :105:

قال اشرايج نمر المستشفى؟؟:114:
طبعا انا استغربت بس قلت يمكن فيه شي

قلت اوكي:24:
قال بس ندخل نسلم و نشوف الوضع عندهم:109:

طبعا هذي لقطه من الجسر المؤدي الى المستشفى

و هذي من الجانب الثاني

و هذي صورة المستشفى

طبعا هني صار موقف طيب

لما وصلنا المستشفى لقيناه مصكر
و لقينا جدول يبين الايام اللي يكون فيها مفتوح
و في هذه الاثناء جونا شايبيين تركيين
يسألون ابوي اذا فيه شي؟او يعاني من شي لان المستشفى اليوم مسكر و اذا محتاج شي ترى المستشفى اللي اليوم مفتوح على بعد6 كيلو
قالهم ابوي لا ما فيه شي بس حب يطلع و يتعرف

و ما امدانا نخلص من هالشياب الطيبيين الا وقفت سياره فيها عساكر نزل واحد تركي بحت ما فهمنا شنو يقول نزل وراها تركي يتكلم انجليزي يتطمن على ابوي و يقول اذا محتاجين شي او حالة طوارئ نوصلكم للمستشفى؟
المستشفى على بعد6 كيلو و المستشفى اللي احنا واقفين عنده يفتح احد و ثلاثاء اذا ما خانتي الذاكره
ابوي تشكر منه و راحوا

هني يبيين مدى طيبه هذا الشعب و حبه للمساعده بدون ما تطلب:113:

و هذا لقيته مسترخي على الرصيف:109:

بعدها رحنا نتمشى و نتسوق
و هذ جم لقطه

بعدها رجعنا و احان بالطريج قلت لابوي خلنا نشتري دجاج من السوبر ماركت
عشان كان ودي اسوي مرقه

طبعا رجعت الشقه و سويت غدانا :106:

بعدها العصر رحنا نتمشى على البحيره و نشبك هناك

على فكره هذا مكتب للاتصال الدولي
بس ما رحنا له قالوا لنا يفتح الجمعه؟؟ هذا اللي فهمناه منهم؟؟

هذا اهم ما في اليوم التاسع
***

اليوم العاشر

23/6

..نزلنا نتمشى 

كنا ناوين بعد الغدا نتمشى فالمنطقة اللي بعد ايجون

قعدنا عند البحيره.:surf

لقينا في تصليحات فالمسجد

و هذا البط

بعد ساعتين كملنا طريقنا ..

استوقفتني هذه اللقطه ..

لما عدينا اكواخ ايجون

لقينه بعده في موتيل ..اول مره نشوفه ..

الوالد كان يبي يتغدا ..و انا كنت شبعانه لاني كليت عند البحيره شبس و خرابيط من الكافتيريا

المهم قلنا ندخل هالموتيل..

هذا المطعم من الداخل

 

و هذي لقطه ثانيه تبين الجلسة الارضيه اللي بالدور الثاني

الولد طلب (لحم+عيش+ سلطه+كولا)=16.5 ليرخ تركية

بعدها مشينا نكمل و نصعد فوق اشوي بعد هالموتيل

فكنا على موعد مع جنة اخرى ..ساحره..

اخليكم مع الصور لانها ابلغ من الكلمات

و هذي صورة للبحيره من اعلى ..

 

وهذي صورة تبّين المسافه بين الموتيل و بين ايجون

و هذي صور للموتيل و احنا نازلين ..بطريق العوده

و هذي صوره مقربه للشلال اللي موجود في ايجون

و هذي اكواخ ايجون

بعض التفاصيل التي تحيك خيوط الجمال في اوزنقول

صوره للبحيره

المدرسة

اكملنا يومنا عند البحيره الى ان غابت الشمس ..

و رجعنا الشقه 

***

اليوم الحادي عشر

24/6

(اليوم الاخير في اوزنجول)

بصراحه كنا في هاليوم على كثر ما احنا مشتاقين لاهلنا على كثر ما احنا ما ودنا نفارق اوزنقول :110:

المهم..مالكم بالطواله..:106:

نزل الوالد يشتري لنا لحم عشان اسوي جبسه على الغدا

جاب لنا كيلو لحم بالعظم ب17 ليره من القصاب

و جاب لنا روب(زبادي) و هذا شكله

المهم

الوالد قضى يومه على الجزيره و اخبار نتائج الانتخابات الايرانيه و المعارضة:109:

و انا انشغلت بالغدا

و بعدا ما خلص غدانا

كانت هذي الصوره

المهم بعد ما تغدينا و عينا من الله خير :106:

سمعنا صوت الحجي اسماعيل صاحب البانسيون

ينادي من البلكونه

راح له ابوي

و لا اسماعيل جامع لنا فراوله و يبي يعطينا اياها من بلكونته

خخخخخ

جزاه الله خير على حسن الضيافه:x1:

و هذي الفراوله

العصر نزلنا نتمشى لاخر مره

و كنا متفقين مع اسماعيل ان يروح معانا يحجز لنا الباص اللي بنرجع فيه لطرابزون

و هذا اسماعيل داخل معانا المكتب

و هذا جدول لقيته معلق

حجزنا تذكرتين ب20 ليرة

و رحنا نتمشى و ناخذ جوله اخيره

بديناها من المسجد

مرورا فالبحيره

و المدرسه

وصلنا الى الشلال اللي امس رحنا له

و كانت هذي الصور

كانت في مساحه صغيره تسمح لنا فالجلوس

قعدت انا و الوالد نتأمل و لاخر مره :110:

بدون أي مبالغه قعدنا تقريبا ثلث ساعه بهدوء تام بدون ما نكلم بعضنا..

من متعة التأمل بهالطبيعه الخلابه ..الواحد معاها يسرح و يطير..

كملنا طريقنا ..الى جهة فندق انصار ..لالقاء النظره الاخيره

هذي البحيره

صور من على الجسر

و هذي صوره لايجون و احنا بالجهه الثانيه من البحيره

مرينا على فندق آآنول نسلم عليهم و نودعهم

و مرينا على محمد و سلمنا عليه

و قال لنا اذا محتاجين أي شي هناك باسطنبول

قلنا له نبي احد يستقبلنا فالمطار و يودينا لفندق قريب لان رحلتنا للكويت الصبح

فكلم صديقه

و اتفقنا معاه ان يستقبلنا من المطار الداخلي المفروض نوصل 8 و ربع

و يودينا لفندق قريب

و يرجع ياخذنا يوم الجمعه يودينا المطار الساعه 9 لان طيارتنا الساعه 11 الى الكويت باذن الله

و تم الاتفاق معاه على 250 ليره

120 للفندق (ليلة مع الافطار)

130 لتوصيل من والى المطار

==

..

بعدها رجعنا الشقه نزهب اغراضنا و نصك الجناط

و هذي اللقطات الاوزنقوليه الاخيره من البلكونه:110:

وداعا يا اوزنقول

***

اليوم الثاني عشر

25/6

قمنا متأخيرن اشوي

و على ما صحصحنا

و تنظفنا و استعدينا ..

و تريقنا..

الا الساعه 2 الا ربع

نزلنا الجناط تحت

و كنا متفقين مع اسماعيل ان يوقف الباص عند البانسيون عشان نصعد الجناط صعبه نشيلها معانا الى المكتب

و البانسيون بطريق الباص و هو خارج من اوزنقول

نزلنا الجناط

و قعدنا ننطر

لفت انتباهي ورقه معلقه :114:

خخخخ طبعا اول مره اشوفها يوم جينا نبي نمشي :109:

الوالد مع اسماعيل صوره تذكارية

وصل الباص مع ما تأخر نص ساعه المفروض يوصل 3 و ربع

وصلنا بال4 الا ربع

و توكلنا على الله

هذي الصور من الطريق الى طرابزون

سايق الباص كان لاهي مع عياله الصغار

وكان الاتفاق معاه ان يوصلنا لباب المطار على قولتهم (الهوالاني)

الاخ مع السوالف نسى و طاف اللفه :112:

قالنا خلاص انزلوا هني :110:

قاله ابوي ما يصير معانا اغراض ما نقدر نمشي هالمسافه

ارجع و لف و وقفنا داخل عند الباب

قال لا ما اقدر و بدوا اللي فالباص يتذمرون

الظاهر اخرناهم خخخ

المهم حاولنا بس ماكوا فايده:105:

امرنا لله:110:

نزلنا و نزلنا اغراضنا

لكن المشكله الاغراض ما نقدر نشيلهم في درب واحد

طيب اشلون؟؟

يروح ابوي و يرجع و انا اوقف عن الاغراض؟؟

طبعا لا يمكن لان الوالد عنده مبدأ ان ما يخليني في مكان بروحي و خصوصا المدن

على اساس خايف على الدره المصونه ههههههههههااي

المهم و احان نفكر في هالمشكله

و الساعه الحين 6 و شي و طيارتنا سبع و ربع

و الا ربنا يفرجها من عنده 

و يسخر لنا اثنين من عباده

اثنين شباب كانوا توهم طالعين من البحر و طلب ابوي منهم يساعدونا

عيال الحلال ما قصروا

كل واحد شال جنطه

و انا و ابوي كل واحد جنطه و مشينا

و وصلنا المطار

سلم ابو يعلى الشباب و تشكر مهم 

دخلنا و و سوينا البوردنق

و قعدنا ننطر

لما صار وقت طيارتنا نادوا و رحنا نوقف ننطر

و كانت معانا جنطه هاند باق فيها اشياء ممكن تتكسر فخليناها معانا فالطياره

المهم يوم جينا عند الجهاز

الضابط وقف ابوي

وقال هذي ترجعها للبوردنق

حاول يفهمه الوالد انها اغراض تتكسر و انا الجنطه مو كبيره

ناس اشكثر معاهم اكبر منها

المهم مافي فايده رجع الوالد دخل و سجلها و رجع

الظاهر الظابط فهم غلط او فهم ان الوالد قام يغلط عليه او سوء فهم ما عرفت و الله

لقينا هناك شخص من اصل عربي جزاه الله خير

ازال سوء الفهم بين الوالد و الظابط

و حاول ان يوضح الصوره

و هو الاخ عبد اللطيف الشامي

جزاه الله خير

بلغونا ان طيارتنا راح تتأخر

والمفروض نطير الساعه 7 و عشر دقايق
و قدنا ننطر و ننطر و ننطر

ما وصلت الطياره الى 9

و كنا نحاتي الاخ اللي ينطرنا في اسطنبول متواعدين معاه على الساعه 8 و ربع

و لكن الحمدلله وصلنا الساعه 10 و نص فالليل

و احنا خلاص ما نشوف جدامنا من التعب

عرفنا الشخص من اللوحه اللي حاملها

و ركبنا معاه و رحنا للفندق

الطريج للفندق ما خذا الا ربع ساعه تقريبا

دخلنا حطينا اغراضنا و طحنا على الفراش بس نبي ننام من التعب ..

***

اليوم الاخير

26/6/2009

قمنا الصبح ..استعدينا للخروج

هذي صوره من نافذة الغرفه

 

 

نزلنا الجناط

..

و رحنا نتريق

 

 

عقب ما خلصنا

قعدنا في لوبي الفندق ننطر التاكسي عشان يوصلنا للمطار

رحت اقعد على القنفه

و الا اشوف لكم شوفه عزكم الله:105:

 

 

طبعا طيران طرت للجه الثانيه و قعدت اراقبهم (من الخوف :109:)

 

 

و اخيرا قعد من النوم الملك و حرمه

 

 

وصلت السياره

طلعنا من الفندق

و قبل لا اركب السياره قلت اشوف شكل الفندق من بره لاني امس ما شفته فالليل عدل

و صورته لكم

 

 

و هذا التاكسي

 

و اتجهنا الى مطار صبيحه الدولي

 

 

نزلنا الاغراض

 

 

و هذي جم لقطه من داخل المطار

 

 

هذي رحلتنا

 

 

و وصلنا لديرتنا بسلامه بفضل الله و كان يومها غباااااااااااار

 

 

مطار الكويت الله يحفظها

 

 

****
تمت هالرحله بفضل الله و عونه
اشكر كل من تابع التقرير
اثريتوا التقرير بتواجدكم الكريم

جزاكم لله على تشجيعكم اللي بعد الله ساعدني باستكمال التقرير
جزاكم الله كل خير
و سامحونا على بساطة التقرير
و لكن مثل ما ذكرت هو ليس بتقرير كثر ما هو موجز لرحله كرد جميل لهذا المنتدى الرائع
كل الشكر و التقدير