اللي ناويين يسافرون قطر ويشرفونا، للعلم انها تغيرت تغير جذري آخر سنتين، هنا لخصتلكم اهم واحلى اماكن سياحية في قطر.. من مقاهي ومناطق ترفيهية ومولات ويامرحبا بكم في بلدكم الثاني ..

اماكن سياحية في قطر

1. مول الحزم

اكيد سمعتوا عن مول الحزم، باختصار لو تدخله تحس نفسك فعالم آخر. اشي فخامة اشي اضواء اشي مطاعم، انصحكم تكون وجهتكم الاولى، من وجهة نظري هذا افخم مول فالعالم.

2. جزيرة اللؤلؤة

اللؤلؤة كانت بحر وتم دفنها وبناء مدينة كاملة على الطريقة الايطالية

تقريبًا كل الاوربيين فقطر ساكنين هنا، المهم انها وجهه مهمه لكل سائح، تبي تحس نفسك فاوروبا؟ زورها

3. كتارا

تبي تشوف الشعب القطري عن قرب؟ تعال هنا، احلى شي المقاهي والمعارض اللي تتنظم فيها، جو ثقافي بحت وممتع بنفس الوقت

4. مشيرب قلب الدوحة

مشيرب للحين ما انتهت لكن جزء صغير منها مفتوح وقابل للزيارة، والله العظيم تصميم هالمدينة ولا بالاحلام، شي مو طبيعي مابي اكثر كلام زوروها وحاسبوني لو ماعجبتكم

5. مكتبة قطر الوطنية

اتوقع هذي افخم واكبر مكتبة بالشرق الاوسط، اي كتاب في بالك بتحصله هنا، منظرها واجوائها يخلونك تحب تقرأ غصب، ياعشاق الكتب والرويات لاتفوتكم

6. متحف قطر الوطني

تصميمه نادر ورهيب بنفس الوقت، اي شيء متعلق بالتراث بتحصله هنا، مكان رائع ويستحق الزيارة

7. لوسيل

لوسيل ايضًا مدينة جديدة للحين ماكتملت، لكن يُسمح بزيارتها، خذ فرتين فيها واضمن لك نفسيتك بتتغير ١٨٠ درجة، كل شي فيها فخم حتى سكانها ماشاءالله بس

8. جزيرة بنانا

جزيرة بنانا هي جزيرة مصغره او تقدر تقول شاليه. فيها كل شيء وياخذك قارب من الدوحة لين هالجزيرة، صراحه قضيت فيها احلى ٥ ايام من حياتي. تجربة ماتتفوت

9. شاطئ لوسيل

شاطئ لوسيل، مكاني المفضل لرياضة المشي، اشي منظر اشي جو اشي ناس، صراحه ١٠/١٠

تبي جو؟ عندنا تبي بر؟ عندنا تبي بحر؟ عندنا

10. مقهى سوشيال

مقهى سوشيال، تعطيهم اغنيتك المفضلة او اي شي تحب تسمعه ويشغلونها لك مع هالڤيو، دعوه للاسترخاء فعلاً

11. منتجع سلوى

منتجع سلوى، افخم منتجع في ٢٠٢٠ صمموه على الطريقة اليونانية

صراحه للحين ما زرته بس مخليه ضمن الاولويات فالمستقبل، شي رهيب ومختلف

12. جامع الامام محمد عبدالوهاب

جامع الامام محمد عبدالوهاب، من اكبر المساجد في دول الخليج، تصميمه جدًا مبهر، دعوه للطمأنينة

فيه بعد اماكن كثير ماذكرتها لكن هذا اللي قدرت احصيه، اتمنى اني ماطولت عليكم، ودعمكم لي بمتابعتي يحفزني، شكرًا لحسن قرائتكم

افخم مولات قطر

افضل اماكن سياحية في قطر
  • الحزم مول
  • فستفال سيتي
  • قطر مول
  • طوار
  • جلف
  • ازدان مول

ملاعب كأس العالم 2022

  • استاد خليفة الدولي
  • استاد لوسيل
  • استاد البيت
  • استاد الجنوب

هذه كانت نهاية تقرير افضل اماكن سياحية في قطر ، اتمنى انه اجاب على اسئلتكم عن اهم المعالم في قطر.

أي استفسار حياكم

إعداد: ثيو
iTheuy @


Booking.com

أكتب تعليق

عنوان بريدك الالكتروني لن ينشر.