استفسار حول السفر إلى لندن

منتدى المسافرون العرب منتديات أوروبا استفسارات بريطانيا استفسار حول السفر إلى لندن

Viewing 7 reply threads
  • الكاتب
    المشاركات
    • #14053
      Maktoob
      مدير عام

      السلام عليكم ورحمة الله وبركاته

      أخواني وأخواتي

      أبي مساعدة بالمعلومات وإذا في مجال للحجز

      أنا من الإمارات وأبي أروح لندن

      وما عندي فرصة إلا بعد 15 أو 18 يوم تقريبا

      ألحين أنا عندي بس 7 أيام علشان أجهز فيها الفيزا وأي شي آخر والسبب إن المحرم ماراح يكون متواجد بعدها وماراح يقدر يسوي أي شي بالموضوع لارتباطه بالعمل

      فعل راح تكفيني لو باشرت من راس الشهر يعني أول مايدخل شهر 8 في عمل هالإجراءات

      كم يبيلنا في إجراءات الفيزا

      ماهي خطوات الحجز اللي لازم نمر بها

      شو المطلوب ووين نروح أبي أعرف كل شي 

      طيب وبعد أبي أسأل عن المصاريف اللي راح أتكبدها من طأطأ إلى السلام عليكم

      القصد إني أبي أعرف هل هناك رسوم للفيزا بكم راح تقدر 

      وكم أسعار التذاكر للشخص الواحد على الدرجة السياحية إلى لندن

      وما هي أفضل شركات الطيران أو شركة طيران زينة

      يعني ماأبيها ماتنفع مووول ،، ولا أبيها هاي ديلوكس 

      لأن ميزانيتي لا تسمح بذلك

      وإذا بغيت أقعد فيها 5 أيام 

      في رأيكم ،، كم المبلغ إللي بحتاجه للصرف هناك

      ؟؟

      وشو الأوفر أخذ لي شقة ولا غرفة في فندق

      نحن يمكن نكون شخصين أو ثلاثة إذا كثرنا 

      أرجو الإجابة ضروري

    • #14054
      Maktoob
      مدير عام

      هلا فيج يا أختي العزيزه الامل

      يشرفني أن أكون اول من يرد على مشاركتج وطبعاا باقي الاعضاء ما بيقصرون معااج
      اول شي سعر الفيزا طبعا سعر الفيزا 405 وطبعا لازم صاحب الفيزا يكون متواجد في السفاره لاكمال اجراءات الفيزا واجراءات الفيزا ما اطول احتمال من يومين لين 5 ايام بصراحه فيزتي خذت يومين
      ثاني شي بخصوص السكن طبعا معروف سعر السكن في موسم الصيف يرتفع فوق بس ارخص من الفندق ونصيحتي انج تاخذين شقه افضل وارخص وبالنسبه للمصاريف يعتمد على صرف الشخص نفسه والمده اللي بتكونين فيهاا في لندن يعني اذا بتكونين في لندن 5 ايام تقريبا من السكن لين الصرف لا يقل عن 10000 بس طبعا يختلف من شخص لين اخر
      ثالثاا اسعار التذكره تقريبا 3000 وشوي وبالنسبه للطيران الاتحاد والامارات هم الافضل للسفر من الامارات

      واذا احتجتي اي مساااعده نحن في الخدمه واعضاء المنتدى ما بيقصرون معاااج

    • #14055
      Maktoob
      مدير عام

      آخر مره مجيكة طيران الاتحاد كان وايد رخيص بداية ال2000 درهم

      الفيزا اتطلعينها من المكتب مجابل نادي النصر بالضبط
      قد ماتقدرين روحي من وقت ، نحن 10 اشخاص الحمدلله بيومين طلعت فيزتنا بس ماتدرين بالظروف
      حجز السكن دامكم ماتحتاجون غير غرفة أو غرفة+صاله فلاتحاتين بتحصلون ان شاالله بس انتي وين تبين تسكنين؟
      وإذا انت تبين تطبخين فاخذي شقة، اذا ماتبين ترى فيه فنادق رخيصه
      المبلغ اللي تحتاجينه هناك على حسب هل في هالايام بتطلعون برع لندن؟ شوبتستخدمون تكاسي ولا باصات واندرقراوند؟ الباصات أرخص شي
      تذكرة أسبوع 13 باوند
      تذكرة الاندرقراوند+ الباصات في الاسبوع 25 باوند
      إذا تذكرة يوميه الباصات 4 باوند فاليوم
      الاندرجراوند 6وشي باوند او 7

      انصحج تاخذين يوميه لأن يمكن مب كل يوم بتسيرون مشاوير يمكن بس تتمشون فالجوار
      طبعا التكاسي أغلى
      اذا ايام بتطلعون برع لندن تذاكر القطار بعد محسوبه
      والاكل كذلك (هل بتطبخون ولا مطاعم غاليه ولا رخيصه)

      اذا شخصين اعتقد صرف يومي100 الى 150 باوند لداخل لندن لدخول الاماكن السياحيه والمطاعم والمواصلات” بدون المشتريات ” ويمكن أقل : ) انتوا واقتصادكم

    • #14056
      Maktoob
      مدير عام

      يزاكم الله خير والله يا غريبة في الدنيا وفجر 

      بيض الله ويوهكم ما قصرتوا

      وانت يا القطري عساك على القوة

      يزاكم الله خير والله وايد وضحتولي شغلات ماكنت أعرفها

      الصراحة أنا رايحة عند ناس مرضى ماعرف في أي منطقة هم بالضبط نسيت شو اسم المنطقة بس هي قريبة من الهايد بارك لأن دوم يروحون هناك تقريبًا

      غير إن قالوا لي انهم في منطقة سكنات العرب والخليجيين ، وان حوالينهم وقريب منهم المستشفيات

      أنا بروح لهم مفاجأة فما أبي أسألهم عن شي علشان ما يشكون يعني يوم بوصل المطار بنحاول ندبر عمرنا وبنتصل عليهم يوم نوصل 

      بالنسبة للاشخاص حاليا 2 ويمكن يكون ثالثنا ولد عمره 12 سنة 
      عندي استفسار

      يعني بما إني متنقبة وما أعرف أشيل نقابي وما أقدر الصراحة أحس إني مابقدر أشيله شو ماصار 

      فهل عندي الحرية في هالشي ،، هل هالشي راح يكون سلس بالنسبة لي وبالنسبة لأي ظرف هناك

      خصوصا إني قريت أخبار تسر عن بريطانيا بخصوص العاملات في المساجد والحجابات اللي وزعوها عليهم غير ان لبسهم الرسمي تنورة طويلة وقميص يعني الأمور طيبة بالنسبة للإسلام هناك

      بس شو بالنسبة لتغطية الوجه
      فقط طبعا الكفين ظاهرين والعباة عباة كتف بس سؤالي بالنسبة للنقاب أحسن ولا الغشوة ؟؟

      بالنسبة للأكل احتمال يكون غالبا في السكن لو كان مسموح لأن يمكن نشيل أشياء خفيفة من البيت 

      والوجبات برع على حسب الحاجة مش دايما يمكن الطفل بس هو اللي يتطلب التغذية أكثر

      بغيت أسأل فيه أشياء ممنوعة في المطار يعني شو طبيعة التفتيش غير السوائل والكريمات 

      لو شليت الكاميرات معاي؟ في الطيارة إز إت أوكي 

      هل فيه إجراءات تتعلق بانفلونزا الخنازير والا الأمور ماشية عادي؟؟

      سامحوني غثيتكم

      لكني عن جد وايد مستانسة على تعاونكم وشرحكم الوافي وفرتوا علي كثير أسئلة وفي ميزان حسناتكم

    • #14057
      Maktoob
      مدير عام

      توصولون بالسلامة
      بالنسبة للنقاب في لندن الامور طيبة ماشاءالله على المسلمين في لندن
      في الدخول ممنوع الاكل بس والتفتيش على حسب المزاج مش اي واحد يتفتش وللعلم السنة الماضية جبت معاي رطب ومالح وبهارات وبعض الاشياء للمطبخ ولاحد كلمني
      بالنسبة للسوائل في حالة الخروج فقط والكريمات تعتبر من السوائل ولكن في الشنطة مش ممنوع – فقط ممنوع في الهند باق داخل الطيارة
      ولاتحاتون وايد الامور كلها طيبة

    • #14058
      Maktoob
      مدير عام

      يزاك الله خير يا أخوي موادع ماقصرت رايتك بيضا

      أبي أعرف أول إجراء شو لازم أسويه

      1) أسير أتصور وأودي الجماعة حق الصور بعد؟
      2) أرجو السفارة وأسوي إجراءات الفيزا
      3) أروح أحجز التذاكر ؟
      جي الترتيب ولا شلون
      سامحوني أول مرة أروح وأول مرة بسوي هالأمور بروحي ،، وسامحوني على المغثة

    • #14059
      Maktoob
      مدير عام

      لاأتحاتين طال عمرج ومافي اي مغثه ابداااااااااااااااااااااا :24:

      كل المطلوب صورتين شخصيه + الجواز + المبلغ + تعبئة الفورمه = توكلوا على الله وروحوا السفاره لتقديم الطلب ..

      واي خدمه احنا في الخدمه

    • #14060
      Maktoob
      مدير عام

      مطلوب في السفارة صورتين خلفية بيضاء + جواز السفر – خذو خدمة vip افضل يخلصونكم ويبصمنكم بروحكم بمبلغ 150 + تكلفة الفيزة وتاخذا تقريبا 2- 3 ايام حجزو وخلصو الفيزة
      رحلة سعيدة

Viewing 7 reply threads
  • يجب تسجيل الدخول للرد على هذا الموضوع.

حمل تطبيق المسافرون

كل هذه المعلومات وأكثر موجودة في التطبيق