السلام عليكم هذا مقال عن رحلة البوسنة والهرسك لمدة 9 ايام والتي تتمتع باماكن جميلة وكثيرة اتمنى تعجبكم كذلك في المقال كل التكاليف التفصيلية .
العدد: 5 اشخاص
التأشيرة: بعض الدول ما تحتاج تأشيرة والي عندة تأشيرة شنغن او تأشيرة امريكا سارية المفعول يقدر يدخل فيها. اما بخصوصنا كسعوديين فالسفارة موجودة في الرياض و إذا كنت خارج الرياض ففي مكاتب تستخرجها لك ب 650 ريال. وخلال هذة السنتين في فترة مبادرة للدخول بدون تأشيرة من شهر 6 الى 9 وتاكدو من سفارة بلدكم.
تكلفة التأشيرة: 1300 ريال /347 دولار لشخصين.
الطيران: فلاي ناس 5 ساعات من مطار جدة الى مطار سراييفو.
تكلفة التذاكر: 8040 ريال /2143 دولار لأربعة اشخاص وطفلة بمعدل 1650 ريال للشخص الواحد.
الوجهه: سراييفو – يايتسي – بيهاتش – موستار
الانترنت: اخذت شريحة الكترونية اون لاين من تطبيقي المفضل ايرالو ب120 ريال /32 دولار لمدة 30 يوم ولازم جوالك يدعم الشريحة الالكترونية.
المواصلات: سيارة فان لمدة 9 ايام من شركة سكست بقيمة 3400 ريال /906 دولار شامل التامين الشامل كما اخذو مبلغ 900 ريال تحت الحساب كتأمين مسترد يرجع بعد ما تسلم السيارة بشهرين تقريباً.
نصيحة: وقت استلام السيارة في جميع انحاء العالم لازم تصورها من جميع الجهات عشان لا تدخل في مشاكل وقت تسليمها.
اول يوم في رحلة البوسنة والهرسك سراييفو
في اول ايام تواجدي في سراييفو اخذت فندق بريزدينت سراييفو وهو في السنتر اخذت غرفتين جنب بعض ب2560 ريال /682 دولار لمدة ثلاث ليالي شامل الفطور والمسافة من المطار الى الفندق 21 دقيقة.
اخترت للعشاء في اول يوم مطعم نوني في منطقة السوق الجديد الملاصق للسوق القديم والمساقة عشر دقائق سير على الاقدام وطلبنا مشكل بمبلغ 70 مارك /144 ريال /38 دولار والاكل جميل وانصح فيه. بعد كذا اخذنا عصير رمان بمبلغ 20 مارك /41 ريال للاربعة الاشخاص.
اليوم الثاني في العاصمة سراييفو
بعد فطور الفندق توجهنا للسوبر ماركت المشهور في البوسنة بينجووو ويعتبر الافضل في كل شي، اخذنا تموين بمبلغ 80 مارك/ 163 ريال.
بعد السوبر ماركت توجهنا للفعالية الاولى صني لاند فيها توبوجان (تكلفته 80 مارك/ 163 ريال لاربعة اشخاص) ومطعم اسمة اوكسجين عنده خيارات جميلة واطلالة حلوة (وتحلينا فيه بمبلغ 34 مارك/ 70 ريال)كذلك يوجد منطقة العاب للاطفال.
توجهنا بعدها لصلاة العصر في مسجد الملك فهد والمسافة كانت 16 دقيقة وهو مركز تبرعت فيه المملكة العربية السعودية والهدف منه خدمة المجتمع المحلي وتعزيز التفاهم بين الثقافات المختلفة وهو واحد من اكبر المساجد في اوربا ويعرف باسم مركز الملك فهد الثقافي والتعليمي.
توجهنا مسافة نصف ساعة الى السنتر قريب فندقنا والعشاء كان في مطعم شيباس بمبلغ 40 مارك/ 81 ريال سعودي. وطول ما انته في السنتر تستمتع بالاجواء والبناء القديم وفيه مكان لبيع العسل انصح فيه. كما يوجد مجموعة من المحلات للهدايا ممكن تاخذ لبلدك.
اليوم الثالث سراييفو
توجهنا الى منطقة تكاثر الثلج وهي منطقة ياهورينا وتبعد عن سنتر العاصمة نصف ساعة والي يحبو الثلج هنا في موسم الشتاء في فنادق ممكن تسكنو فيها لممارسة انشطة العاب الثلج وهذي المنطقة استضافت الالعاب الاولمبية لروعة جبالها وتضاريسها لها طعم في الشتا ولها طعم مختلف في الصيف.
ركبنا التلفريك وكلفنا 80 مارك/ 162ريال لاربعة اشخاص يوديك لقمة الجبال وهناك حلينا في القمة بمبلغ 40 مارك/ 81 ريال واكتشفنا المنطقة في الاعلى ونزلنا من التلفريك واستاجرنا دباب نصف ساعة ب 70 مارك/ 142 ريال ودخلنا بين الغابات والمنحدرات وبعد كذا رجعنا ثاني للسنتر واكنا في المطعم الافضل لحد الان مطعم كلوبا بمبلغ 133 مارك/ 270 ريال.
نصيحة: اذا جيت سراييفو اقضي كم يوم السكن في السنتر وكم يوم بيعد عشان تقدر تتنقل براحتك.
اليوم الرابع الطريق الى يايتسي
في اليوم الرابع من رحلة البوسنة والهرسك كان التوجة من سراييفو الى يايتسي والمدة بين المدينتين ساعة ونصف وانتبه من خرائط جوجل، التنقل بين المدن متعب جداً لكن ممتع في نفس الوقت. اول الخروج من سراييفو 20 دقيقة يكون الطريق علية تقريباً 10 مارك لأن الطريق حديث وخط سريع لكن بعد كذا يكون متعرج ويدخلك بين المدن والقرى. الطريق السريع في البوسنة تاخذ ورقة وعند نهاية وجهتك تعطي الموظف الورقة ويعطيك كم المبلغ حسب المسافة المقطوعة وحجم السيارة نحنا دفعنا 10 مارك/ 20 ريال.
وصلنا الى مدينة ترافينك الي كانت عاصمة الوزير العثماني من 1686 الى 1850. وفيها القلعة الشهيرة ستارجرادو ودخولها كان ب 16 مارك/ 32 ريال للاربعة اشخاص. كما يوجد مواقف في تلك المنطقة والحمام في مطعم فندق فيزربلاس قدام بوابة القلعة. كذلك في مسجد اذا دخل وقت الصلاه ممكن تصلي فيه.
توجهت لمدريك من ترافينك والمسافة بينهم تقريباً نصف ساعة. وهناك يوجد مطل جبال فلاسيتش انها ممتعة في فصل الصيف انصح بزيارتها. ومن مايجي على هذي المنطقة الا ويزور ماما حسيبة تبيع العسل والجبن. وكمان لو اتصلتو عليها من بدري تجهز لكم الفطور وتعيشو لحظات ريفية. والعائلة كلها لطيفة ومضيافة وضيفونا هذا اليوم.
رحلة البوسنة والهرسك الوصول يايتسي
ذهبنا بعد كذا الى مدينة يايتسي بمسافة ساعة وانتبهو ترى البوسنة في الشتاء يبدأ دخول الليل الساعة 4 والصيف الساعة 8. وعشانا كان في يايتسي مطعم فونتانا المتواضع بمبلغ 25 مارك /50 ريال. والمواقف 2 مارك /4 ريال وفي المواقف خلي معالك النقود المعدنية عشان جهاز الرفع.
السكن في يايتسي
سكنا في الفندق للاسف الوحيد في المنطقة اربعة نجوم وهو فندق بليفسكو جيسيرو ليلتين غرفة بثلاثة سراير 612 مارك/ 1246 ريال. مشكلة الفندق ان ما عندة مصعد هو اصلاً دور واحد لكن تضطر تشيل شنطتك بنفسك. كذلك ماعندهم غرفتين في شقة وحدة للعوائل لكن عندهم اربع سرائر وبينهم بارتيجن صغير وحمام واحد للاسف مشترك. كما ان الفطور عندهم بسيط مرة ويسووه في وقتها.
اليوم الخامس: التوجه إلى بيهاتش
اتوجهنا هذا اليوم الى مدينة بيهاتش وتحديداً شلالات نهر اونا بمسافة ساعتين. شفنا النهر ولو عندكم شَوي ممكن تجلسو في هذي الاماكن وتستمتعو بيومكم. وأيضاً في بعدها منطقة ممكن تروحوها شلالات شترباتسكي مع اني افضل انكم تسكنو في مدينة بيهاتش يومين وتزورو هذي الاماكن عشان تاخذو راحتكم فيها.
بعد كذا توجهنا لمطعم فندق كوستل سكاي بوك واتغدينا ب 144 مارك/ 293 ريال. وهذا الفندق من افضل الفنادق في مدينة بيهاتش ممكن تاخذة كم ليلة واطلالتة جميلة على النهر.
بعدها عبينا ديزل للسيارة بمبلغ 149مارك/303 ريال ورجعنا الى مدينة يايتسي لان للاسف عدد ايامنا في رحلة البوسنة والهرسك قليل.
اليوم السادس في مدينة يايتسي
خرجنا للبحيرة الي قدام فندقنا بحيرة بليفا وهناك في ركوب للقوارب المائية وفي خيارات كثيرة لكن بحكم فصل الشتاء فالمكان فاضي وهادئ واعتقد في الصيف حيكون مكان بطل. استاجرنا قارب 60 مارك/ 122 ريال لمدة ساعة لفينا حول البحيرة. بعدها مشينا لمسافة دقيقتين وشفنا الطواحين المائية وبعدها في اماكن تستمتع فيها ممرات وجسور مائية.
رحلة البوسنة والهرسك الانتقال الى موستار
انطلقنا في هذا اليوم الى مدينة موستار الي تبعد عن يايتسي مسافة 3 ساعات. واكرر خذو وقتكم في كل مدينة وعدد الايام اكثر لأن الطريق متعب وطويل بين المدن لكن اكرر الطبيعة تنسيك كل شي.
عند وصولنا موستار اخترت السكن من بوكنج فيلا مايك صالة وثلاث غرف نوم لمدة ليلتين ب355 مارك/ 723 ريال. وهي عبارة عن جزء من فيلا في الدور الاول لكن للاسف حمام واحد مشترك وما فيها شطاف والجميل فيها موقعها عند السنتر.
تعشينا هذا اليوم في مطعم سدر فان في السنتر بمبلغ 117 مارك /238 ريال وكذا انتهى يومنا السادس.
اليوم السابع في موستار
في هذا اليوم مشينا على السنتر بمسافة 8 دقايق من الفلة الخاصة فينا وتجولنا في الاماكن القديمة هناك. وشفنا الجسر في المنطقة كذلك شربنا قهوة فيه بمبلغ 25 مارك/ 50 ريال. وانطلقنا سير بالاقدام مسافة ربع ساعة الى اشهر مول في المنطقة وهو ميباس مول. وهناك تلقو عروض لاشهر الماركات لكن للاسف يفتقد المول لتعدد المطاعم فيه. المول هناك فيه فندق الي حابب يسكن فيه فندق ميباس لكن مافيه غرف كبيرة للعوائل.
ورجعنا للسنتر وفي الطريق كان في مطعم انصح فيه كافيه بارباليك البيتزا عندهم طعمة والمشروبات كمان كلفنا 30 مارك/ 61 ريال.
اليوم الثامن في رحلة البوسنة والهرسك والتوجة الى سراييفو
في هذا اليوم توجهنا من مدينه موستار الى العاصمه سرايفو المسافه كانت ساعتين. وقبل توصل ب20 دقيقه لسراييفو يتحسن الطريق ويكون برسوم طريق 7 مارك/ 14 ريال. ومرينا على كافيه لاسول وكان وقت افتتاح وتجربة صراحة شي يفوق الوصف والخيال.
السكن في سراييفو
توجهنا بعد كذا لفندقنا روتانا واخذناه بمبلغ 410 مارك/ 1700 ريال. غرفتين وصالة كبيرة وحمامين واحد صغير وواحد كبير ويوجد فيه شطاف وانتو بكرامة وبلكونة كبيرة جداً لمدة ليلتين شامل الفطور.
ورحنا هذا اليوم الى احد المولات الكبيرة في السراييفو وهو اس سي سي وتسوقنا. كما ان حلاوة السوق فيه مطاعم بكثرة والخيارات متنوعة. وفي كذلك محل صرافة لو اي مطعم ما عندة بطاقة واتعشينا بمبلغ 50 مارك/101 ريال من مطاعم متفرقة.
اليوم التاسع والاخير سراييفو
بعد الفطور الجميل الي يقدمة الفندق رحنا كاخر يوم للسنتر لشراء الهدايا. ولو معاكم سيارة وتبغون توقفو جنب السنتر هنا في هذي المنطقة فيه مواقف سيارات تكلفتها تقريباً اثنين مارك ونص للساعة. انا دفعت 5 مارك/ 10 ريال.
بعد شراء الهدايا التذكارية من السنتر رجعنا قريب الفندق هناك في غسيل السيارات الذاتية لكن لازم يكون عندك عملات معدنية عشان تغسل سيارتك بنفسك. وكلفني غسيل السيارة 10 مارك/ 20 ريال والعشاء كان في نفس الفندق روتانا بمبلغ 90 مارك/ 184ريال وبكذا انتهى يومنا الاخير.
من المناطق الي ماقدرت الحق عليها وممكن تزورها منطقة اليجا وحولها مطاعم ومناطق ترفيهيه، نفق الحياة الي له قصة وقت الحرب، كذلك هنا في منطقة تلفريك.
تكلفة الرحلة الاجمالية
تكاليف الرحلة كاملة 10755 مارك بوسني / 22000 ريال سعودي/ 5863 دولار /5517 يورو وكانت هذي التكاليف شاملة كلي شي لعدد اربعة اشخاص وطفلة.
في الختام ، اشكركم على متابعة رحلة البوسنة والهرسك واتمنى تكون عجبتكم وتكونوا استفدتوا منها، دمتم بخير.
مشاري هلال
Booking.com
