الرئيسية > التقارير > شرق اسيا > المالديف > تقرير رحلتي لجزر المالديف Paradise Island

تقرير رحلتي لجزر المالديف Paradise Island

السلام عليكم ورحمة الله وبركاته

اليكم تقريري المصور المتواضع لرحلتي إلى جزر المالديف الحالمه لشهر العسل

سيكون التقرير طويل جدا وعلى اجزاء اعانكم الله 🙂
لذا اتمنى منكم الصبر جوزيتكم خيرا عليه

وايضا اعتذر عن قله الصور فالتقرير ليس بالتفصيل الممل لان رحلتي بالاساس كانت لشهر عسل لذا اعتذر منكم ايضا

الصور كلها احترافيه
تم استخدام كاميرا canon 500D
عدسه كانون 18 – 55
عدسه كانون 50mm
عدسه كانون زوم 70-300
ترايبود مانفريتو وبعض الفلاتر للحمايه

نبدأ بسم الله

طبعا كنت مقرر اني اسافر لاندنوسيا لرحله شهر العسل
ولكن اخوكم نحس فجاب النحاسه لاندنوسيا فجاهم تسونامي وبركان انفجر عندهم << كان باقي شويه واغرقهم هههه

فقلنا نغير للمالديف وجات معاها سيرلانكا برضو بضربت عصفورين بحجر واحد
وان شاء الله اعرض صور لرحلتي لسيرلانكا بعد انتهائي من المالديف

وكلها كانت ممتازه

التذاكر لمن يسأل
2000 ريال جده كولومبو – ذهاب وعوده – شخصين ( الخطوط السعوديه للأسف سيئه ولا انصح بها )
2500 ريال كولومبو مالي – ذهاب وعوده – شخصين ( الخطوط السيرلانكيه افضل بمراحل )

السكن في المالديف
2000 دولار مع الفطور
1000 دولار صرفيات تقريبا نشاطات واكل

المده
5 ايام

ما ابغى اخوض في تفاصيل السفر اتوقع الكل يعرفها

وسأبدأ تقريري من يوم ما شغلت الكام ونا متجه الى المالديف في الخطوط السيرلانكيه

المده من سيرلانكا للمالديف ساعه بالطائره ووقعت عيني على جزر المالديف وشكلها الرهيب من فوق

تم الهبوط في المطار بكل سلاسه
والمطار عباره عن جزيره مستقله لوحدها وهو ميناء لليخوت والزوارق الصغيره في نفس الوقت
طبعا صورت الهبوط بالفيديو علشان كذا المعذره مافيه صور كثيره له

طبعا بعد اجراءات الجوازات السهله جدا ولأننا مسلمين اتفاجأت بمعامله خاصه احسن من الاجانب في المالديف
بحكم انها دوله مسلمه
لقينا مندوب الفندق في استقبالنا واتوجهنا على وسيله النقل للفندق

فيه وسيليتين للنقل في الماليدف من والى الفنادق

الاولى

الطائره المائيه

الثانيه
الزوارق وهي اللي اخترتها

طبعا اول ما مشي الزورق شفنا العاصمه مالي وهي عباره عن جزيره لوحدها ايضا

بعدها شفت كم منتجع في طريقنا وهذي صور لهم




وصلنا لجزيرتنا
وكان فيه لها من الخارج حاجز حجري للحمايه من امواج المحيط
واول ما دخلنا من الحاجز وجدت هالمنظر بوجهي

وهذا

طبعا كان منظر خيالي بالنسبه لشخص جاي من صحراء ههههههههه

هذا الممر للاستقبال

وفيه مطعم على اليسار مع مسبح وبار

من كثر صفاء البحر تشوف السمك منه

هذا على بوابه الاسقبال ( اسم المنتجع )

اسم المنتجع ورابطه: منتجع وسبا بارادايس آيلاند

طبعا ما صورت الاستقبال او اي شي حواليه ما كنت ابغى إلا الفراش من التعب

لكن اتفاجأت بأن الاستقبال يقولي اتفضل للاستقبال الثاني
وهو خاص بفلل الـ Heaven

وهي الفلل اللي تكون على البحر وهي على مستوى اخر من فلل الشاطئ السيئه
طبعا الكل يعرف البانقلوز ما يحتاج شرح
ولها مطاعمها الخاصه ايضا .. وعمال خاصين بها

احذر احذر من فلل الشاطئ تعبانه وكلها زواحف

الصراحه الواحد يتحسر انه تعبان ونفسه ما يوقف تصوير هههههه

فيه شي حلو في الفلل انه عندهم سيارات قولف توصل الناس في الفلل اللي على البحر
اما الناس اللي عندهم فلل في الشاطئ يطقونها مشي
لكن ودك تمشي في الجزيره هذي وما توقف ابدا وش ابغى بالسيارات الصغيره دي ونا اشوف هالمناظر ههههه

المهم وصلنا للغرفه
الغرفه مجهزه بأحدث التقنيات
شاشه مسطحه وافضل القنوات للأفلام
وستاند سماعات مع كيبل للاي فون 🙂
وحاطين لك سترات نجاه ( خصيصا للغرف اللي فوق البحر )
طبعا جابو لنا قروره واين وقلت لهم شيلوها ما احتاجها لأني مسلم وما اشرب خمر
فجابو لي عصيرات طازه في المقابل
وفيه ثلاجه فيها انواع العصيرات
مره شربت شي منه فجاب لي دوخه ما عرفت ايش هو :26: ههههه لا تاخذوها بجد عاد :d

الحمام شي ثاني

اما المنظر الخارجي خرافي

على اليسار الشاطئ 🙂

المهم حطيت راسي للنوم وما صحيت إلا بالليل

***

صحينا على غروب اول يوم من الجوع

وطبعا كان غروب رائع اخذت فيه بعض الصور


الله يعينكم على وجع العين هههه

اخذنا لفه بعد الاكل ولقينا المسبح اللي محد يسبح فيه

وهذا الاستقبال في الليل

سألتهم عن الانشطه وكلها كانت في الصبح
فاخترت زياره لجزيره محليه ومنتجع اخر لليوم التالي

طبعا رجعت للفيلا كون انه مافي اي نشاطات ليليه كثير في المالديف
غير الديسكوهات والبارات
ولقطت لكم صوره الفلل في الليل
النور الابيض هو السياره القولف ما خلاني اصور براحتي ابد

هذي صورة حوض الاستحمام في الفيراندا <<< كلام متعوب عليه هههههه

المهم انتهى هذا اليوم ونمت نوم طويل << كيس نوم الاخ
وقمت الفجر وقبل لا امسح وجهي شفت هالمنظر وصورته ههههههه

من اليمين على الشروق

اخذت لفه قبل لا اروح افطر في المطعم ومعايا الكام <<< محد كان فيه من الفجر إلا اخوكم

من الامام والخلف

الشاطئ اللي على يسار الفيلا
والسماء بدأت تتلبد بالغيوم

المطر اللي يحبه قلبك هههه

رجعت الفيلا وانتظرت الى وقت الفطور والمطر ما كان يسمح لنا بالتمشيه
ونا طالع اخذت هاللقطه من عند الباب

المطعم << ماله صور كثير كل مره يكون عليه هجوم هههه

بعد الهجوم قصدي الاكل اتوجهت للقسم الغربي من الجزيره مكان الاستقبال للذهاب إلى رحلتنا للجزيره المحليه
يقوموا بإنزال الستائر هذي للحمايه من الامطار في كل مكان

هذول الشله اللي رايحين ويانا رايحين للقارب

اعتذر الصورة مائله << سقطت سهوا

القارب اللي ودانا قارب محلي
وطبعا كانت صدمه بالنسبه لي كنت افكره سبيد بوت
والقارب هذا مره ما يأهل كبير مره وبطيء لكن لابد من تجربته

جزيرة قريب مننا

الكروز حقها مكتوب عليه اتول كروز يمكن يكون تبع اتول الله واعلم

هذا استقبال فندق اخر كان قريب من الجزيرة المحليه

شفت لكم واحد يتزلج بالباراشوت كان فنان <<< اشهد له هههههه

هذا الكروز برايفت كان قريب

وصلنا الحمد لله للجزيرة المحليه
بعد ما امواج المحيط لخبطت عفشنا مزبوط واحنا راكبين في المركب المحلي
( اسمه Doheni باللغه المالديفيه )

هذا المرسى تبعهم

وهذا المكان اول شي تشوفه في الجزيرة

زوووم

دخلنا على سوقهم

وعلى قوله الرجال اللي يبيع
ذيس از شارك تييث !!!

الشارع الرئيسي

هم اللي يزينون شوارعهم بنفسهم ( قوارير زجاج )

طفله مالديفيه

شويه امشي إلا والقى لكم هالتحفه

الله يديم علينا وعليهم نعمه الاسلام
فيه شي حلو انه مساجدهم جدا فخمه حتى افضل من بيوتهم بكثير عكس الحال عندنا
وتلقى الكل ينظف فيها معتبرينها بيت الله بكل معنى الكلمه

مرينا بها الشارع الله يرزقنا ويرزقهم

ولقيت بوجهي هالمنظر
شجر المانجروف محيط ببحيره عذبه في نصف الجزيره !!!

شفت شجره قريب على اليسار وفيها ثمره غريبه

وطير ما عرفت وش هو

صور اخرى للمانجروف

طوليه

مشينا شويه على اليمين والقا لكم هالمنظر يا سبحان الله
هذي الصوره الوحيده اللي مافيها اوادم
كان ودي انزل اكثر لهذا المكان بس نص البشر اللي فيه اوربيين وامريكن مشلحين الله يستر علينا

مشينا شوي علشان نروح محل المنحوتات الخشبيه
وهذي بعض المقتطفات

المقبره باين فيها المصلى والبئر لغسيل الموتى

لقطه ثانيه

وصلنا للمحل
هذي الاشكال على الباب اشاره انه محل منحوتات

دخلنا المحل وعجبتني فيه بعض الاشكال كنت بشتريها لكن ….

غاليه وما انصح احد بالشراء تلقونها في مالي والمطار ارخص
ويتكلمون معك كأنه ميه وخمسين دولار على قطعه خشب ولا شي
طبعا اللي يبغى يشتري من عندهم براحته بس في العاصمه ارخص والمطار بعد
لكن المطار ما تلقى عندهم بعض الاشياء لذا وجب التنبيه
طبعا ما صورت كثير من القهر هههههه

بعدها انتهت جولتنا في هالجزيره واتوجهنا للمنتجع الاخر بالبوت المحلي
هذي قوارب محليه الصنع

وشفت وراها طياره مائيه توها هبطت وقلنا نوريكم منصه الهبوط حقها

فيه بوت يجي يستقبلهم لما ينزلو على هالمنصه شي بسيط ورهيب

المهم
وصلنا للمنتجع واسمه شايا
ما انصح احد يروح له منتجع مبالغ فيه بالاسعار بالنسبه لمستواه<< ما يعني انه مو حلو
شفت تقرير لاحد الاعضاء هنا ويقول انه اتبسط فيه للاستزاده بصور اكثر عنه
بس فيه اشياء كثير غاليه والمويه عندهم مو ببلاش لازم تشتريها
بس والله عندهم شي جميل جدا انهم ينظمو رحلات ما بين الفنادق
عمليه تسويقيه واعلانيه غير مضره ابدا

بس لو حابين تحجزوا فندق كويس ممكن تشوفوا هنا قائمة افضل فنادق المالديف في بوكنق

مرساهم من البحر

صوره ونا عند الاستقبال

هذا مركز المساج تبعهم والجو بدأ يقلب علينا يا زين المطر بس

لقطه لبعض الفلل ويا الشاطئ

طبعا ما صورت كثير
للأسف كان الهوتيل هذا مليان اجانب متسدحين
واللي يعرف الاجانب دايمن مشلحين حتى وهم رايحين للكنيسه لابسين نص كم خخخخخ
الله يستر علينا

المهم هذا نهايه هاليوم وكاميرتي امتلت وما كان عندي ميموري للأسف علشان اصور لكم غروب هذا اليوم

انتظروني ان شاء الله علشان انزل لكم رحلتي بالغواصه في اليوم اللي بعده ان شاء الله

***

طبعا لما رجعنا من الجزيره المحليه والمنتجع ذهبت للاستقبال لارى النشاطات لليوم التالي
فلقيت رحله بالغواصه تحت المويه

كانت الرسوم 100 دولار للفرد فقلت لهم سجلونا واتوكلنا

صحيت اليوم التالي وافطرت ورحنا للرحله

اخذت هذي الصور ونا في الطريق

طبعا صور الفلل لازم <<< خاق عندها
قلت يمكن لا شافوها في النت يشتروها من عندي <<< احلم هههههه

على يسار الفلل هذي المره قريب

وعلى اليمين

بالنسبه للسباحه للي يفكر يروح هناك
اول شي انتبهو التيار جدا جدا قوي
افضل الاماكن للسباحه شمال وجنوب الجزيره من جهة الغرب
رمل جدا ناعم يمكن تشوفوه في نهايه الصور من اليمين واليسار

المهم بعد ما اتحركنا في المركب جانا مطر واسدلت الستائر في المركب
وما صورت للأسف كثير إلا لما قربنا من الغواصه

طبعا وسيله النقل كان المركب المحلي الغثه تقول بوت من ايام جدي

صورتين من الطريق

هذي اللي ورى العاصمه عليهم تصاميم حلوه في البنيان

وصلنا للمنصه حقت الغواصه
وكانت الغواصه توها طالعه من تحت البحر

المنصه على شكل حرف U
هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 673×426 .


يقومو بتوفير ماء مجاني وعصائر وكوفي وكله ببلاش
ويعطوك شوكلاته كمان وحركات فلا تشيليو هم العطش

قمره القياده والكابتن وومن

ما قدرت اصور من الداخل كانو فيه ناس واستحيت منهم <<< ابو الحيا ههههههه

المهم كل التصوير كان فيديو فالمعذره على قله الصور يا باشوات 🙂
وكمان ما نبغى نحرق للي يبغى يروح في المستقبل ان شاء الله ههههههه

اول شله قابلتنا من السمك


وبعدين ننزل شويه

وكمان شويه

نظره لفوق

شله اخرى

ومنظر خرافي

اسف جدا جدا على قله الصور

لكن الصراحه كانت ساعه ولا اروع

انصح بالدعاء وانت في باطن البحر يمكن محدش دعا في المكان ده قبلك 🙂

فيه شي كمان يجول في خاطري وبوريكم عليه

الاجواء ليلا في المالديف جدا جدا رائعه ورومانتيك
فالمشي على الشاطئ ليلا شي خيال
صوت الموج مع صوت الشجر نجوم فوقك باينه بشكل خرافي
ونجوم عند رجلك
ايه فيه نجوم ههههههه

اقولكم كيف
فيه مخلوقات مرجانيه تطلع في البحر احيانا بشكل نقط فسفوريه ( اهل السواحل يسمونه شلا او شلى )
يبان كأنه طريق فسفوري على طول امتداد الشاطئ وكل ما تجي موجه يبان اكثر
ما اعرف اسمها العلمي ولا كان سدحتها لكم

طبعا ما اهملت جانب التصوير مره اخذت كم صوره ههههههه << ملحوس تصوير

رجعت عند الممر لانه كان فيه نور

هذي هي النقاط الفسفوريه بس كل ما رحت للظلمه تبان اكثر

هذا الممر في الليل من هناك اخذت الصوره حقت الشلا

وهذي نجوم المالديف

نوصل نهايه هذا الجزء وسامحوني على قله الصور بالنسبه لهذا اليوم

وان شاء الله الجزء الجاي فيه صور ونختم فيه رحلتنا بإذن الله

***

في اليوم الاخير في المالديف قررت ان استمتع بالجزيره بدون عمل اي نشاطات اخرى

يعني اخذت هذاك اليوم استرخاء وسباحه ومساج وتمتع بالمناظر والبحر الاخضر والرمال الذهبيه <<< وش رايكم بالوصف هههه

صحيت الصبح طبعا للافطار وذهبت في جوله على الجزيره

كانت الاجواء جدا رائعه وغيوم ما تخطر على البال

ندع الصور تتحدث ( حاولت انزل لكم صور اكثر عشان تستمتعو بالمناظر )

=

=

=

=

سبحان الله

=

=

=

طبعا جا الظهر والسباحه كانت ممتعه مع هالاجواء

بعدين في العصر طلعت استمتع بالغروب ايضا

بعض الغيوم المتبقيه من ظهر ذاك اليوم
=

طبعا عاد اللي يروح للمالديف لازم ياخذ مساج هناك ولا ما تكمل الرحله

مركز السبا ( المدخل )

كان التصوير ممنوع هناك بس خطفت صورة على الطاير ههههه

بعدها ذهبت للعشا وما قدرت اصور كنت مهتم بالهجوم على الاكل

بس كان في المطعم اشكال عجبتني بالحيل مسوينها صورتها لكم

بعد العشا ونا طالع من المطعم لقيت لوحه تعلن عن وجود العاب خفه مجاني وماجيك شو قلت ادخل اتفرج مع الشعب

كان حلو لتضييع الوقت لكن مو ذاك الزود يعني لو فوتوه لا تندمو عليه 🙂

بعد العرض رحت اجهز اغراضي علشان السفر لان موعد رحلتي الصبح باكر فلازم اطلع بدري للبوت السريع

طبعا كانت الاخلاق قافله وقت السفر حالي حال كل الناس
صدقوني محد يبي يطلع من هالجنه اللي في الارض

ياما اتمنيت انه الطريق هذا يكون طويل عشان ما اطلع ههههههههههه

بس وصلت بسرعه 🙁

والله هذا الشايب كانت قافله معه بقوه ههههه

نظره اخير للوراء

=

لحظي التعيس كانت الاجواء خياليه يوم السفر ايضا هههههههههه

وصلت الاغراض ويا ليتها ما وصلت هههههه

طلعت البوت وودعت المالديف بكل عزاء ودعاء للرجوع اليها -_-

صور من البوت

=

=

بهذا انتهت رحلتي للمالديف اخوتي الكرام

وحاضر لاي استفسار لكم

كما ارجو ان يكتب الله لكم زياره هذه الجزر الساحره

قولو امين هههههه

تحيه عطره 🙂

هل كانت الصفحة مفيدة؟

شارك المقال:

حمل تطبيق المسافرون

كل هذه المعلومات وأكثر موجودة في التطبيق

أضف تعليق